WILLEMSTAD - Transparensha Musikal esaki ta tema di e workshop ku e músiko internashonal Kurasoleño, Leo Davelaar lo duna (gratuitamente) na tantu kantantenan komo músikonan.
Den pasado Leo Davelaar a kompañá diferente artistanan grandi manera: Percy Sledge i Oscar Harris. Tambe el a kompañá diferente artistanan internashonal manera Toni Scherman, Ced Ride, Maruja Boogard (esakinan ta djis di algun di e tantísimo produkshonnan ku el a partisipá na dje).
Durante su estudio di músika general, pòp i arte na Ulanda, el a haña oportunidat pa sigui diferente kursonan manera ‘segunda indexering’, ‘vocal coaching’ i ‘koor techniek’. Tambe e tabata toka i tambe dirigí diferente proyektonan musical grandi na Ulanda, manera entre otro Sound of Diversity – crossover group, un grupo di kantantenan talentoso ku ta krusa diferente estilo. Rotterdam Mass Choir – un koro di mas ku 75 hóbennan for di e área di Rotterdam kantando muzik urban gospel i hopi mas.
Na e momentonan aki Leo ta na Kòrsou i bou di e lema: ‘It’s not music that can change the world but what’s done with music that can.’, e lo bai duna algun workshop pa di e forma aki duna un aporte na nos kultura musikal.
Aparte di e workshopnan ku e lo bai duna na Boneiru 14 di mei i tambe na prizòn, Leo lo tene dos workshop general (pa kantantenan i Músikonan) anto unu espesífikamente pa pianistanan:
E Workshop general lo tuma lugá riba 16 i 17 di mei próksimo, di 19:00 te ku 22:00 ‘or.
Durante e workshop aki lo trata: desaroyo di oido musikal, modulashon, pasada i artikulashon harmóniko (voicing).
E workshop Masterclass piano lo tuma lugá riba 21 i 22 di mei di: 20:00 te ku 22:00 ‘or
E puntonan ku lo ser tratá ta: rosea musikal, formashon klásiko, power chord (PW) i tambe chart reading I i II.
E workshopnan lo tuma lugá na House of Worship, Erosweg 52 i lo ta grátis.
Pero si ta asina ku kada partisipantenan mester paga pa e material ku lo wòrdu usá.
E buki di transferensha ta kosta fl. 35.— i e buki di 101 voicing pa piano masterclass ta kosta 40,--. Tur dos buki a wòrdu skibí dor di Leo Davelaar i ta na e idioma Papiamentu.
Pa inskripshon òf informashon por yama: 737-2716 (Zion Recording & Music Academy).