WILLEMSTAD – 40 Kaya den besindario di Oost Jongbloed, Liverpool, Bonam, Zuid Bonam i Kirindongo Abou, ayera a haña nòmbernan di baluartenan musikal. Den un evento históriko ku a tuma lugá ayera den Curaçao Festival Center, den kua a ofisialisá e nombramentu aki den presensia di 9 baluarte ku si ta na bida i mandatario i famianan. Un seremonia impreshonante den kua sigur lo pèrkurá pa tira lus riba esnan ku en bèrdat a destaká riba tereno farandulero. Un programa kompleto presentá pa e komishon ku a keda enkargá ku e nombramentu aki pa trese historia bibu di esnan ku a keda nombrá.
Di e 40 baluartenan ku a keda nombrá, 9 ta na bida i ku tabata presente na e okashon spesial den Festival Center. E baluartenan ku a ku a haña nombramentu pa nòmber di kaya ta Gabriel “Gachichi” Archangel Martis, Danillo “Denny” Plantijn, Juan Camelia, Eruimidez “Kimu” Candelaria, Gilbert “Gibi” Djaoen, Vivienne Frans, Nemensio “Chi” Domitilia, Eleazar “Chal” Atalita, Hendrik Ewald van Velzen, Ernst “Augusto” Gressmann, Clovis Bazur, Newburn Patricks, Edwin Thomasa, Stenlly Cornelia, Mirugia Winterdal-Elisabeth, Jose “Djo” Casseres, Florencio “Lou” Martina, Dominico Herrera, Louis “Lucho Carelli” Zschusschen, Oswin Henriquez, Franklin “Peng’ de Windt, Macario “Macaay” Prudencia, Felix Juliana, Anselmus “Boy” Dap, Cornelis Felicia, Mafalda Minguel-Salsbach, Ludwig Samson, Fortunato van Aanholt, Oswald Specht, Julian Alejandro Frans, Wilfrido Valeriaan, Gilberto “Beti” Doran, Edgar “Gachi” Supriano, Andres Snijder, Hubert Fernandez, Leonard “Leo” Renaud, George Willems, Raymond “Boy” Brion, San Bamasito Papa Anita i Petronillia “Petoi” Coco.
Aparte di interpretashon musikal di algun kansion di e baluartenan, tabatin diskursonan di órden pa rekonosé esfuersonan di e aporte musikal di e baluartenan na Kòrsou. Boeis Augusta komo presidente di e komishon a hiba palabra, meskos ku presidente di AMAK, Feco Gomez, ademas di diputado di Kultura Marilyn Alcalá-Wallé i gezaghèber Lizzanne Dindial. Despues di desvelo di e bòrchi ku e nuebe nòmbernan komo un akto simbóliko, ya ku ta 9 di e 40 baluartenan ta na bida, a sigui un invokashon spiritual ku tabata na enkargo di pastor Norwin Josepa.
Tambe palabranan di representantenan di e famia pa gradisí pa e atenshon pa sigui ku e ruta, kaminda famianan a kompañá pa bai desvelá e bòrchinan den e respektivo kayanan kaminda nan ta situá.