ORANJESTAD- “E cambionan den e Ley di Admision y Deportacion di Extranheronan (LTU), cu Gobierno a introduci dia Prome di Juli 2006, a percura pa consternacion grandi den hopi sector di comunidad. E fraccion di AVP den Parlamento, a vota contra e cambio den LTU e tempo ey pasobra e tabata inhusto pa cu esnan cu ta depende di permiso y no ta funciona pa esnan cu ta depende di empleadonan di exterior.
Pesey Fraccion di AVP a presenta mocionnan pa gobierno cambia e aplicacion di e ley mientras cu ta traha ariba un concepto di Ley pa revisa e loke Gobierno a introduci na 2006.
Un grupo di trabao di AVP a keda encarga cu e iniciativa di Ley pa cambia e Ley actual. Awor por mira cu gobierno a cuminsa realisa su eror y DIMAS a anuncia cu lo no pone e fecha aki mas pa esnan cu tin permiso promer cu 2002. Pero ainda ta keda cu esnan despues di 2002 li haya e fecha inhusto aki di 2009 den nan permiso.
Mike Eman ta splica cu e asunto cu permiso por worde renoba unicamente te cu 2009 a causa hopi danjo pa esnan cu ta depende di un permiso.
E Lider di oposicion ta mustra cu hopi no por haya finaza pa e motibo aki y otronan a worde perhudica den haya pasaporte, pasobra maske nan tin mas cu 10 anja bibando na Aruba e fecha fatal di 2009 ta scirbi den nan permiso.
Hopi veredicto a mustra cu e cambionan cu Gabinete Oduber a bini cune den LTU ta en pugna cu derechonan adkiri di esnan riba permiso y ta enpugna cu tratadonan internacional. Pesey e mocion di AVP a pidi pa gobierno aplica e ley y maneho di LTU conforme e veredictonan di huez y conforme tratadonan di derecho humano.
E comision di AVP pa revisa e ley di LTU a reuni cu diferente gremio pa yega na proposicionnan pa cambia e Ley di Admision y Deportacion.
Riba e asunto di tres anja por a nota cu algun gremio no tabata cla den nan opinion y tabata kier mas tempo pa mira si e por funcciona. Awor ta tende mas cla di comunidad cu e asunto di tres anja no ta funcciona.
E lider di AVP, Mr. Mike Eman ta mustra cu den e fase preparatorio ya un serie di punto cu actualmente ta causa situacionnan doloroso, a worde consata den e Ley concerniente y e maneho di Dimas.
E ta papia entre otro di: (a) e forma inhusto di atende cu ciudadanonan di otro paisnan den reino; (b) e hecho cu awor ta limita duracion di permiso na tres (3) aña; (c) e hecho cu gobierno den su maneho a elimina permisonan permanente (liber) despues di diez (10) aña; (d) y e hecho cu tabata limita turistanan pa keda mas cu 30 dia na Aruba.
E lider di AVP ta indica cu mientras Aruba ta forma parti di Reino, miembronan di paisnan di Reino cu Aruba mester y a pidi pa bini Aruba y labora aki, ta worde confronta cu un cargamento di rekisitonan formal, cu casi ta pone esnan envolvi dicidi cu mihor nan regresa nan pais. Como partner den Reino, Aruba tin obligacion di suavisa reglanan di adminision pa “rijksgenoten”.
Mantencion di e actual nivel di calidad di turismo, mescos cu su crecimento, a worde impedi hopi dor di cambionan den e Ley di Admision y Deportacion. E limitacion di permanencia di turistanan ta completamente contra e pensamento basico di turismo: cuida e turista y duna un servicio excelente.
Turistanan cu tin time share of un apartamento na Aruba, mester worde trata cu respet. AVP ta mustra ariba e imagen cu Aruba a haya for di aña pasa ora a determina cu un turista no por keda mas cu cuatro siman na Aruba.
Ariba tereno social tambe e cambionan di gobierno su maneho di admision ta conduci na hopi dolor den comunidad. Den hopi caso stranheronan ta worde incorectamente y inhumanamente trata.
E cambionan den e Ley di Admision y Deportacion ta conduci na escenanan sumamente doloroso ora mester termina contrato despues di tres (3) anja. Segun AVP por y mester alcanza un areglo diferente. Mescos ta conta pa elimincion di permisonan permanente despues di un estadia di diez aña na Aruba. AVP ta concidera e negamento di permiso liber despues di 10 anja di permanencia legal como inhumano y mester worde rechaza. Mr. Mike Eman ta papia di un areglo nobo cu ta haci e derecho riba permiso liber despues di 10 anja legal na Aruba un derecho ancra den ley.
E puntonan aki lo worde inclui den e iniciativa di e cambionan cu fraccion di AVP ta bai entrega na Parlamento como concepto di Ley di cambio di LTU.
Mr. Mike Eman ta bisa cu e trato inhumano y inhusto di stranhero no por sigui asina. Pesey AVP ta spera cu ora bin cu e cambio riba LTU cu e fraccion di MEP lo recapacita.