ORANJESTAD- Partido de la Liberación Dominicana, PLD, di actual President Leonel Fernandez a manda un invitacion personal pa miembro di Parlamento pa fraccion di AVP, Otmar Oduber pa asina e forma parti di e grupo di observadornan internacional den e proximo eleccionnan presidencial cu lo tuma lugar 16 di mei awor.
Ta masha poco hende ta haya e honor aki y Otmar Oduber a sinti su mes orguyoso y privilegia di a haya e invitacion aki directamente for di PLD.
E ta considera esaki como un reconocemento na su trabou cu el a bin ta haciendo na Aruba, caminda entre otro e ta promove hunto cu AVP e ideanan cristian democrata den un pais democratico.
Otmar Oduber a comenta cu semper el a sinti un aprecio masha grandi mes pa Republica Dominicana y su hendenan, kende el a bin ta conoce na Aruba, mustrando di ta personanan honesto y semper buscando un mihor porvenir pa nan mes y pa e pais caminda nan ta biba.
Tambe Otmar a duna di conoce cu ultimo biaha cu el a bai Republica Dominicana el a keda asombra pa mira e desaroyo cu e pais aki ta pasando aden, y awor cu el lo bai atrobe, e biaha aki den un rol hopi importante pa e desaroyo democratico di e pais, e ta sigur cu el lo por trese mas ideanan cu adaptando esakinan pa Aruba lo por contribui na e desaroyo turistico di Aruba.
Mester corda cu ultimo biaha cu Otmar Oduber a bai Republica Dominicana, hunto cu su colega di partido y di Parlamento, Mike de Meza, nan a concentra riba e parti di adictonan problematico, caminda cu na e pais ey nan a bin ta haciendo un tremendo trabou pa cu esaki, cual sigur ta dunando su frutanan tambe.
E biaha aki tambe Mike de Meza, invita door di ODCA pa fungi como observador, lo ta biahando hunto cu Otmar pa asina ta presente den e proceso democratico na e pais aki.
Nan ta saliendo rumbo pa Republica Dominicana diaranson awor y lo ta na Aruba bek diasabra proximo, un dia despues di e eleccionnan presidencial.
Mester remarca cu PLD a invita Otmar Oduber na un nivel diplomatico hunto cu otro dignatarionan interncional, lo cual ta ilustra mas ainda e aprecio cu e partido dominicano aki tin pa un di nos politiconan hoben, Otmar Oduber.
Esaki sigur ta un reconocemento no solamente pa e hoben politico, colonia Dominicano, pero pa Aruba henter, caminda nos hendenan ta wordo aprecia pa un pais cu cual nos tin un vinculo masha grandi mes. Pabien Otmar.