PEKIN, China, - Agensia ofisial di notisia Xinhua a bisa ku 5.000 persona a pèrdè nan bida den un solo distrito.
E esun agensia a indiká ku mas o ménos 900 studiante por ta derá bou di ruinanan di un skol sekundario na provinsia di Sichuan.
Un temblor di magnitut di 7,5 kalkulá riba eskala di Richter awe a sakudí provinsia chines di Sichuan, Sentro Geológiko di Merka a informá, i por a sinti e temblor n’e kapital tailandes, situá mas o ménos 3.300 kilometer di e episentro.
E Instituto Sismológiko di Pekin a elevá e temblor asta 8 grado di magnitut.
Ta kalkulá ku kasi 900 studiante ta bou di ruinanan n’e provinsia di Suchuan, agensia estatal Xinhua a informá.
Promé a bisa ku e sifra ofisial di morto ta 107 persona i 34 hende a resultá heridá.
Den prinsipio agensia estatal di notisia Xinhua a konfirmá di morto di 4 mucha eskolar ora dos skol a kai den otro pa motibu di e temblor n’e poblashon di Chongqing (sùitwèst di China), na provinsia di Sichuan, situá mas o ménos 300 kilometer di episentro di e temblor.
E mesun agensia di notisia a informá ku a manda trupanan n’e zona afektá.
Tambe a anunsiá ku Promé Minister, Wen Jiab, lo biaha bai n’e área.
Dos skol primario n’e lokalidat, na distrito di Liangping, a kai den otro komo konsekuensia di e temblor, un di esnan mas fuerte ku a okurí n’e pais asiátiko den 30 aña.
Chongqing ta situá mas o ménos 300 kilometer di episentro di e temblor lokalisá pegá ku lokalidat di Wenchuan, un zona di seru 92 kilometer nortwèst di Chengdu, na provinsia di Sichuan.
Algun habitante di e kapital chines a kore sali fo’i nan kas alarmá p’e temblor, ku a sintié prinsipalmente na edifisionan haltu.
Di akuerdo ku e agensia ofisial, hopi edifisio a keda evakuá.
A sinti e temblor ku gran intensidat na siudat di Xian, situá mas o ménos 500 kilometer nortost di e episentro.
A evakuá sentenar di turista fo’i hotèlnan, na mesun momentu ku trahadónan i studiantenan tabata sali for di fábrikanan, negoshinan i skolnan.
“Nos tabata move manera un barku!”, un turista spañó a komentá minütnan despues di a kore sali fo’i un restorant yen di hende di Xian.
Na provinsia di Yunnan, Xinhua a informa di derumbe di edifisionan.
Na Chengdu, kaminda a sinti e temblor mas tantu, otro edifisionan tambe a keda evakuá.
A realisá ocho réplika n’e zona.
“Nos a sinti un sakudimentu kontinuo durante dos òf tres minüt. Tur persona ku tabata den nos ofisina a kuminsá kore baha trapi. Ainda nos ta sigui sinti temblornan leve”, un empleado di un ofisina na Chengdu a bisa.
“Mi no a mira edifisionan tumbá, pero si mi a mira un sker grandi den muraya di un kas”, un dama a bisa via telefòn fo’i Chengdu.
Poko despues komunikashonnan di telefòn a kai afó i tambe na otro siudatnan serkano, miéntras ku outoridatnan a sera aeropuerto internashonal di e siudat temporalmente.
“Un temblor fuerte a okurí. Nunka nos a mira algu asina’ki na Chengdu. Koriente kai afó”, un otro dama di e siudat aki a afirmá.
Chengdu ta kapital di Sichuan, situá mas o ménos 100 kilometer for di episentro di e temblor, ku 10 mion habitante.
Na e distrito finansiero di Pekin, hopi trahadó a sali for di nan ofisina, pero no ta’tin dañonan visibel n’e lugá.
E servisio di metro no a keda afektá.
Sentro Geológiko di Merka a informá riba su ‘web site’ (http://earthquake.usgs.gov) ku e temblor ta’tin profundidat di 29 kilometer.
Promé a informá ku magnitut di e fenómeno tabata 7,8.
E agensia meteorológiko di Hapon a bisa ku no a emití alèrta pa tsunami.
E edifisio mas haltu na China, e toren Jinmao, i otro raskashelunan na distrito finansiero di Shanghai a keda evakuá, testigunan a bisa.
E temblor a afektá operashonnan di e bolsa di Shanghai di kua e edifisio a keda evakuá debí n’e temblornan poko promé ku siere di e hornada.
Tambe por a sinti e temblor na Bangkok, kapital di Tailandia, kaminda edifisionan tabata move durante vários minüt.
Un bosero di e sentro sísmiko chines a bisa ku ainda tabata evaluando episentro di e temblor i su magnitut.

Foto: China reskata studiantenan 1205

Reskatistanan ta trata salba studiantenan heridá na Juyuan Middle School awe.

Foto; China hendenan 1205

Hendenan ta trata enkontrá nan pertinensianan entre ruinanan di edifisionan ku a kòlèps awe.

Foto: China studiantenan 1205

Studiantenan chines ta yuda evakuá un mucha.