WEST VIRGINIA, Merka, - E karera presidensial demókrata mañan lo bai tene elekshonnan primario na West Virginia.
Ku solamente 28 delegado den wega, e estado chikitu aki situá wèst di siudat di Washington tin tiki di disidí den e lucha presidensial.
I muchu ménos ku e karera kasi resolvé na fabor di senador Barack Obama.
Fo’i dia e elekshonnan primario di siman pasá djamars na Indiana i Nort Carolina, ekspertonan, analistanan i medionan di komunikashon a pronostiká ku Obama lo bai ta ganadó di e karera.
Revista TIME inkluso a saka riba su portada un pòtrèt di e senador pa Illinois ku e título:” “And the winner is....” (I e ganadó ta......).
Hillary Clinton, sin embargo, a insistí na okashonnan ripití ku e lo keda den e karera, manera ademas su siguidónan a pidi.
“Naturalmente mi ta sigui!”, Clinton a sigurá djasabra último entre aplousonan di mas ku shen atmiradó na Shephardstown.
“Pakiko mi ta sigui? Pasobra mi tin ku sigui!”, Clinton a sigurá na un otro evento.
Obama, di su banda, tampoko ta hasiendo esfuersonan pa pusha su rival for di e karera, ounke ya e ta preparando kaminda.
Den entrevista ku kadena di televishon Fox News, inkluso el a deskartá yuda ku parti di sèn di su kampaña pa Clinton sali for di debenan.
“Mi ta gusta di por tin ku senador Clinton un amplio diskushon kon ami lo por lag’é sinti mihó riba e proseso, i di tin’é den ekipo mirando padilanti”, Obama a kontestá.
Bèrdat ta ku e matemátikanan ta bisa ku Obama tin e nominashon kasi sigurá.
Obama tin bentaha den mas o ménos 165 delegado riba Clinton, ora solamente 217 ta keda den wega den e proseso di e elekshonnan primario.
I, e siman aki pa promé bia fo’i dia ku e kampaña a kuminsá, e senador di 46 aña a bai dilanti den rekuento di e “Superdelegadonan”, e kargonan eligí i figuranan di e partido kendenan tin derecho direkto pa vota den e konvenshon ku lo koroná e kandidato di Partido Demókrata na Denver na kabamentu di ougùstùs.
Apesar di esaki, Clinton ta sigui insistí.
Despues di West Virginia, lo bai keda solamente sinku elekshon primario mas den e kareda demókrata pa eligí un kandidato den e elekshonnan presidensial di 4 di novèmber benidero.
Dia 20 di mei habitantenan di Kentucky i Oregon lo vota, dia 1 di yüni ta turno di Puerto Rico i dia 3 di yüni Sur Dakota i Montana lo sera e elekshonnan primario.
Manera ta kasi matemátikamente imposibel ku Obama ta alkansá nominashon ku e elekshonnan primario, e lo bai tin mester di apoyo di e “Superdelegadonan”, na kendenan Presidente di Partido Demókrata Howard Dean, a urgí pa ya nan manifestá nan voto públikamente promé ku kabamentu di yüni.

Foto: Hillary Clinton 1205

Hillary Clinton, senador pa New York.