WILLEMSTAD - Pa djadumingu awor, por spera un manifestashon grandi riba Plasa Brion. Esei ta un dje desishonnan ku Aliansa Patriótiko a tuma despues di e enkuentro di djasabra último.
Djasabra, Aliansa Patriótiko a tene un enkuentro na Hòfi Barbolina den kua a invitá tur hende pa diskutí último desaroyonan.
E enkuentro a sirbi komo un forma pa desahogo pa hopi hende.
Loke a kore manera un liña kòrá den e enkuentro tabata – lógikamente – e oumento di preis di energia, esta tantu gasolin, diesel i pronto tambe awa i koriente.
Un dje kosnan ku mas ta molestiá hopi hende ta e forma ku gobièrnu a tuma e desishon pa oumentá tarifa. Hopi ta konsiderá ku tabata na su lugá pa gobièrnu a presentá alternativa kon pa dil ku e oumento di preis di energia i no djis simplemente pasa e oumento di preis di krudo pa e konsumidó.
“Nos a spera un maneho di parti di gobièrnu. Nos a kere ku gobièrnu lo a bin ku ideanan kon pa atendé ku e oumento di preis. Ami a kere semper ku un gobièrnu ta konsistí di hende ku ta pensa mas leu ku mi mes, ku ta bin ku pensamentunan inovativo. Pero kiko nos a haña? Un gobièrnu ku simplemente a pasa e oumento di preis pa nos. Tur pais na mundu ta bezig ta wak kon pa atendé ku e asuntu aki,” asina un partisipante na e enkuentro a bisa LA PRENSA.
Gobièrnu a demostrá ku e no sa kon atendé ku esnan di ménos rekurso, kon atendé ku krísis i tampoko kon atendé ku problemanan ku presentá. E pakete di medida anunsiá pa gobièrnu den fin di siman, pa e aliansa no ta sufisiente. Mester di muchu mas pa mitigá efektonan di e oumento devastador di preis di energia, segun nan ta argumentá.
Pa awe mèrdia, dirigentenan di Aliansa Patriótiko lo reuní den forma di urgensia pa kaba di atendé e aktividatnan programá pa e siman aki. Di akuerdo ku informashon ku nos a risibí, tin bon posibilidat ku den transkurso di e siman aki lo bin aktividatnan pa demostrá e malkontentu ku ta reina.
E aktividatnan aki ta e preludio pa un manifestashon grandi fin di siman.
Pa djadumingu awor, lo tene un manifestashon grandi riba Plasa Brion, pa asina manifestá e malkontentu ku ta biba bou di komunidat. Den kurso di e siman aki, lo duna mas detaye di e enkuentro di djadumingu awor.