WILLEMSTAD – “Kompanianan grandi ku ta gana hopi plaka na Antia, mester realisá, ku nan mester kontribuí na pais. Nan no por sigui gana tur plaka di mundu, miéntras ku situashon sosial na Antia ta motibu di hopi preokupashon”.
Esei ta loke Ronald van Raak, bosero pa Antia di Socialistische Partij a anunsiá.
Van Raak a denunsiá loke el a kalifiká komo eksistensia di paraisonan fiskal ku ketu bai ta eksistí na Antia.
Mi a komprondé ku tin mas di 300 kompania grandi ku ta ganando hopi plaka den e pais aki, pero ku no ta dunando nada bèk na pais.
E kos aki simplemente no por. No por t’asina ku e islanan ta pasando momentunan difísil anto otronan ta disfrutá di sirkunstansianan hopi faborabel, segun Van Raak.
Un ehèmpel konkreto segun el a menshoná, ta e kaso di eksistensia di e kompania Valero na Statia. E kompania no ta pagando kasi nada na belasting, pa kolmo e no ta empleá kasi niun siudadano di e isla tampoko den su empresa, segun Van Raak.
Van Raak a mustra, ku e ta hasi un investigashon pa determiná si e kompanianan aki ta kontribuí den otro forma ku e parti sosial di nan komunidat, “pero mi tin miedu ku esei tampoko ta e kaso,” el a bisa.
E bosero di SP a bisa, ku e no ta kere ku si e islanan aki haña nan obligá ta paga algu na belasting, ku nan lo bandoná e isla. Nan ta gana sufisiente pa kontribuí, sin ku esei ta afektá nan posishon finansiero, el a agregá.
“SP”, segun Van Raak, “no tin problema pa Ulanda eliminá pa un gran parti e debe di Antia, un montante di alrededor di 2.2 bion euro.
Pero di otro banda no por t’asina tampoko, ku despues ku kaba di eliminá e debe aki, situashon sosial pa e habitantenan dje islanan ta keda meskos”, el a bisa.
“Na yüni awor, lo tin un debate den Tweede Kamer riba e asuntu aki”, asina Van Raak a anunsiá. El a bisa di ta konvensí, ku Ulanda tin un responsabilidat den esaki.
“Den e situashon estatal nobo ku e islanan ta bai drenta pronto, tipo di situashon asin’aki no mag presentá mas”, di akuerdo ku Ronald van Raak.