WILLEMSTAD – “Ni maske eliminá Curoil, preis di energia ta keda haltu. E diferensha ta, ku e oumento ta dal e konsumidó den forma direkto. Curoil en realidat ta fungi awor aki komo un tipo di “buffer”. Ademas, bo mester keda ku un kompania ku ta hasi distribushon. Curoil t’ei pa yuda komunidat i e tin potensial pa krese sigur un 5 biaha e volúmen ku e ta awor aki”, asina Gensley Capella, direktor di e kompania aki a enfatisá den enkuentro ku prensa.
Pa hopi tempu tin komentarionan insistente ku ta bisa ku Curoil ta un dje faktornan ku ta pone ku preis di kombustibel ta keda haltu. Curoil ta kobra su parti pa distribuí kombustibel. Si merkado por a haña e kombustibel den forma direkto for di e produktor, anto esei lo skapa gastu i redusí e tarifa, di akuerdo ku e vershonnan ku por a tende. No mas ku ayera, por a tende e komentario aki atrobe, despues dje anunsio ku preis di gasolin, diesel, awa i koriente ta bai subi drástikamente.
Direktor di Curoil, Gensley Capella sinembargo a desbaratá e ponensia aki. El a bisa, ku pa basta aña kaba, Curoil ta pre finanshando preis di energia pa Kòrsou. Ta kalkulá ku e montante ei entretantu a yega 100 mion florin.
En realidat, asta ku e promé oumento ku ta drenta na vigor awe djaluna, ainda Curoil ta sigui prefinansiá preis di kombustibel, pasobra ainda e no a yega e nivel di merkado. Awor aki por ehèmpel, preis di gasolin en realidat ta 46 mas haltu i di diesel, 78 sèn mas karu. Komunidat lo mester a paga e preis mesora ku e suministrado ta kobra, segun Capella.
Ta un hecho di nos pais ta usando masha hopi energia. Ta kalkulá ku balor di e energia aki ta alrededor di 700 mion pa aña.
Segun Gensley Capella, un punto positivo ta e hecho ku Curoil a bin ta krese formalmente den su negoshi riba nivel internashonal.
Si ántes, Curoil tabata bende 40 porshento riba merkado internashonal i 60 porshento riba merkado lokal, awendia e relashon ei a bòltu i a bira 70 porshento venta riba merkado internashonal i 30 porshento riba merkado lokal.
Ta danki na e kresementu aki riba merkado internashonal ku Curoil tabata den posishon pa karga ku e pre finansiamentu mionario aki.
Si tabata un kompania ku no ta di gobièrnu, ku tabata den man privá, anto ta sigur ku e lo no a karga ku e pre finansiamentu di preis di e forma aki, segun Capella.
E direktor di Curoil ta konvensí ku su kompania ta den posishon pa sigui krese den e añanan ku ta bini. “Nos por krese muchu mas i si nos sigui krese, nos ta den mihó posishon pa yuda komunidat”, Gensley Capella a afirmá.