ROMA – Inter no a logra konkistá e scudetto djadumingu ora el a yega solamente na un empate i a permití pa Roma aserk’é pa promé bia na solamente un punto riba e penúltimo fecha di kampionato.
Inter a empatá 2-2 ku Siena dilanti mas di 70 mil tifoso ku a yena stadion San Siro pa selebrá e título nobo, miéntras ku Roma a gana Atalanta 2-1.
E ekipo milanés a keda ku 82 punto i Roma ku 81, di manera ku tur kos lo keda disidí den e próksimo i último fecha di kampionato italiano. Si nan kaba empatá, e título lo bai pa Inter, pasobra e resultadonan direkto entre nan dos ta favoresé.
Inter tabata den bentaha dos bia i Siena a logra empatá mes tantu bia. Na di 78 minüt, e defensa di Inter Marco Materazzi tabatin e oportunidat grandi di anotá e gol di triunfo ku lo a duna su tim e título, pero e kiper a kue e pinalti.
Inter a bai ariba ku un gol di kabes di e defensa franses Patrick Vieira na di 11, pero Massimo Maccarone a duna Siena e empate na di 30. E hóben Mario Bolatelli a bolbe manda Inter ariba ku un gol di kabes na di 45.
Despues, na di 70, manera un baño di awa friu a bini e empate atrobe di Siena ku un gol di e hungadó franses Houssine Kharja na di 70.
Ta e di dos bia ku Inter ta faya ku e gol desisivo, pues riba e fecha promé el a pèrdè 2-1 ku Milan.
Tur kos lo keda disidí ora Inter bai hunga ku Parma di su eks treiner, e argentino Hector Cúper, i Roma ta bai Catania pa e di 38 fecha.
Den San Siro nan a biba un ambiente di velorio, ku fanátikonan ku a bandoná e stadion batí, pasobra nan a konsiderá ku esaki tabata e wega apropiá pa logra e título, pues Sieno no tabatin nada di gana ya ku el a logra mantené su mes den Seri A, ku tabata su meta.
Roma, en kambio, a selebrá e triunfo den su stadion Olímpiko, kasi komo sikiera el a kue e título, pues ya el a duna esaki komo pèrdí. Tur os lo disidí djadumingu.
Christian Panucci a manda Roma ariba ku gol di kabes na di 23 despues di un tiru liber presis di e bolante chileno David Pizarro. Daniele de Rossi a anotá e di dos ku un tiru liber na di 67.
Ora e wega tabata bai kaba, na di 87 Giampaolo Bellin a hinka e gol di Atalanta.
Un gol di e delantero uruguayo Jorge Andres Martinez a duna Catania un importante empate 1-1 kontra Juventus.
Juve a logra e empate di agonia ku un anotashon di Alessandro Del Piero na di 89, loke lo por nifiká e salbashon pa Catania ku ta luchando pa no bai abou.
Juventus tin e di tres puesto sigurá ku 71 punto.Den su stadion Napoli a imponé ku 3-1 riba Milan ku golnan di e bolante eslovako Marek Hamsik na di 37, di Mauricio Domizzi na di 69 ku pinalti i di e oustriako Gyorgy Garics na di 90. E ulandes Clarence Seedorf a hinka e úniko gol di Milan den tempu èkstra.
Fiorentina a dal Parma 3-1.
Fiore ta superá Milan riba tabla di posishon i e ta na di kuater puesto ku 63 punto. Su meta ta di keda di kuater pa saka e último pasashi pa e próksimo Liga di Kampionnan.
Lazio a gana Genoa 2-1.
Den otro weganan Torino a gana Livorno 1-0; Cagliari-Udinese 2-0; Sampdoria-Palermo 2-0; Reggina-Empoli 2-0.
Na e último tres puestonan ku ta esnan di degradá, a keda Parma ku 34, Empoli 33 i Livorno 30. E último aki ta outomátiko den Seri B. E dos otro kandidatonan pa degradá lo keda disidí den e fecha final.