Durante di konferensha di paisnan LGO Karibense:

WILLEMSTAD – Paisnan di Karibe mester sòru pa mas tantu posibel partisipá den ekonomia global ku ta un refleho di nan nesesidatnan i prioridatnan. Esaki tabata e mensahe sentral di e diskurso di Sekretario di Estado di Finansa, sr. Alex Rosaria, durante di un konferensha tokante di koperashon entre paisnan LGO Karibense organisá pa e Servisio enkargá ku Koperashon pa Desaroyo (DOS).
Pa siglonan largu e struktura ekonómiko mas bien ta un refleho di nesesidatnan di otronan en bes di esnan di nos mes. “A bira tempu pa kambia e strukturanan ekonómiko pa asina esakinan ta realmente un refleho di nos posibilidatnan, nos propio nesesidatnan i prioridatnan,” segun e Sekretario di Estado.
Mester surpasá e mentalidat di dependensia ku ta reflehá su mes den kerensia ku ta Gobièrnu mester hasi tur kos i stèns riba “bondat” di otro pais pa hasi lokual nos mes mester hasi. “Pa por tin éksito den ekonomia internashonal, bo mester ta eksitoso na kas promé. Nos mester tin e kurashi pa fleksibilisá nos merkadonan di labor i kapital i sòru pa un maneho ku ta stimulá kompetensia sano i eliminá práktikanan indebido di komersiantenan,” segun Rosaria a trese dilanti den su diskurso.
Banda di esaki, nos paisnan mester eksigí un partisipashon real den foronan internashonal ku ta trata temanan di komersio internashonal. Tambe ta importante pa nos paisnan chikí hasi mihó uso di konosementu di nos diáspora, esta nos poblashonnan ku a disidí di forma nan bida den otro pais. Finalmente Rosaria ta boga pa mas koperashon di nos paisnan den Karibe sitando e famoso poeta Cubano, José Martí, ku a bisa “Si no trabajamos juntos, juntos desaparecemos”.