Ta kon Kòrsou a para bira asina? Ku ta parse awendia ku ta mas fásil pa yega Amsterdam òf Miami. Pasobra si bo ke biaha bai un destinashon for di Kòrsou i bo ke tin sigur ku ta fásil pa yega e destinashon ei anto mester ta Miami òf Amsterdam.

Tur otro destinashon ta aparentemente un reto eksklusivo. Puntra hende ku den último simannan a biaha p.e. pa Aruba, Boneiru, Sto. Domingo òf Caracas. Puerto Rico no por yega mes mas direktamente.
Aruba i Boneiru a demostrá muchu biaha den último simannan di ta destinashonnan di oro. Pa yega nan tabata un odisea. Pa bini bèk otro reto.
Caracas ku un ten por a bai mainta bin atardi manera ta Bándabou ta kuri bai bin bèk, tambe a bira un destinashon ku no ta asina asina por haña fecha pa bai ni bin ora bo ke.
Kisas ta un impreshon ku ami so tin. Pero kon por splika ku nos, pará den porta pa haña un status ‘mihó’ den reino, ku nos ta parse di ta mas aislá ku semper.

Ta parse ku pa yega St. Maarten òf Aruba ta bon bo bai Miami òf Amsterdam i kaba tuma un buelo direkto djei pa bo destinashon. Semper tabatin opservashon riba e echo ku ta difísil pa biaha den Karibe. Mester tin hende hopi sabí ku por a pensa kon superá e bareranan di komunikashon físiko den Karibe, sino ta bira tempu pa un hende sabí hasi esaki un proyekto.
Lo mi preferá di pensa ku e situashonnan pekuliar di último simannan kaminda tabatin situashonnan kaótiko pa biaha bai djis ei, lo ta eksepshonnan komprendibel i tolerabel. Pero tin un mensahe den e realidat aki? Kisas? Kua ta e prioridatnan ku maske ta atendiendo ku empresanan aéreo privá no tin sosten di maneho pa e biahero? Kua ta e pániko ku nos mester tin realmente ora ta atendé ku biahero i nan derechinan?
Si tin problema pa transporte anto mester duna splikashon na e biahero pa e sa pa e por plania ki desishon e ta bai tuma. E komunikashon indiferente ku hopi biahero ta i a eksperensiá resientemente, ta parti di e malesa di mal servisio ku amor i pashon ku mayoria dunadó di servisio na Kòrsou ta sufri di dje. Pero ora bo paga plaka ta bai biaha anto bo topa hende ku no tin problema pa duna indikashon ku nan no tin kunes ku bo ta iritashon adishonal. Bisa un pasahero ku e por bai, lag’é kana bai paga un pasashi i ora e yega bèk den ménos ku dies minüt bis’é masha trankil ku tabata un kibukashon, pasobra e buelo ta kompletamente yen tòg. I informe ku e por haña su sèn bèk, pero sin konsiderá su tempu, esfuerso i energia gastá pòrnada. Òf laga pasaheronan sinta i sinta pendiente di un informashon di kiko ta bai pasa, miéntras ku niun representante di e aeroliña no ta duna kara.

Ta bèrdat: ta trahadó nan ta, e lugá no ta di nan i nan no ke hende rabia ku nan, miéntras ku no ta nan falta ku e buelo no ta bai manera a indiká. Pero siendo trahadó na e momentu ei ta nan ta representá e empresa òf nan no ta konsiente di e pida ei?
I turesten tin hende ku a biaha bai Aruba via di Valencia. Tabata mas lihé pa a yega asina ei.

Banda di aspektonan valioso ekonómiko finansiero mester ta asina ku tin vishon ideológiko patriótiko pa loke ta nos akseso semper pa region. Ki nos ta hasi riba un isla ku dos destinashon sigur i tur otro destinashon kisas?
Mester puntra si dikon. Dikon ta sigui di ta difísil pa biaha den nos region. Dikon ta resultá difísil pa biaha bai for di Kòrsou si bo no ta bai Miami òf Amsterdam.
Por ta ku tin algun rason ku ami no ta altura di dje? Lagami sa!

Bon siman

Por komuniká ku Reyna Joe na who@whoiswho.an