WILLEMSTAD – Un dama shofùr di bùs a keda sin entrada i ku un pia práktikamente mankaron, despues ku el a trompeká riba un rant di betòn den Punda. E suseso a tuma lugá dia 2 di febrüari 2007 i for di e dia ei e dama no por a kore su bùs mas. Konsekuentemente e ta sin entrada i ku un pia kasi mankaron.
LA PRENSA a dediká hopi atenshon na e kaso akí kaba aña pasá. Na e okashon ei LA PRENSA a kombersá tantu ku e relashonista públiko di Selikor komo ku un representante di D.O.W. Awe LA PRENSA a bolbe kombersá ku e dama i el a kòrda nos, ku ta for di 2 di febrüari 2007 el a trompeká riba un rant di betòn na altura di Wilhelmina Café den Punda. Dor di e kaida el a kibra su rudia i mester a oper’é. “For di den hòspital mi a kuminsá yama D.O.W. pa splika nan kiko a pasa. Einan a bisami ku ta Selikor ta responsabel. Ora mi a yama Selikor i splika ta unda mi a kai, nan a bisami ku ta D.O.W. mes ta responsabel. E dos instansianan a kuminsá bula pipa pa yudami i mi a disidí di bai Ombudsman. Te ku 1 luna pasá ami huntu ku un representante di Ombudsman tabatin un reunion ku tantu e direktor di Selikor Kook komo e direktor athunto di D.O.W. Bata.”
Mas aleu e dama a splika, ku durante e reunion a palabrá ku e tin ku manda tur su gastunan pa D.O.W. pa nan por tuma un desishon. Segun e dama, e no a tende nada mas for di e dia ei. Un representante di DOW a splika LA PRENSA, ku nan a manda tur kos pa Selikor i nan tampoko no a tende nada mas. Ta pa e motibu ei nan a disidí na manda e dokumentonan pa AJZ pa einan sigui ku e proseso.
Entretantu e dama ta kompletamente desampará ya ku for di febrüari 2007, 1 aña i 2 luna e ta sin entrada. Ta bin aserka segun e dama, ku ta tur dia e ta sufri di un doló inmenso. Entretantu dor di e operashon na su rudia, su ènkel tambe a kuminsá dun’é problema i te asta e tin ku bisti un sapatu ortopédiko. “Ta tur dia mi ta sufri di doló i mi no tin fin di haña un fecha pa operá di nobo. Dòkter mes a konstatá, ku mi mester bolbe hasi un operashon. Dor ku mi no por kore bùs mas, mi no tin sèn pa mi mes paga bai afó pa un operashon. Mi ta yen di doló antó sin entrada”, e dama a sklama finalmente.
LA PRENSA a kombersá awe atrobe ku un representante di D.O.W. i el a primintí di averiguá ku e direktor kon leu e proseso ta.