MANCHESTER, Inglatera – Dick Advocaat tabata e piesa klave di un temporada di tres título di Rangers na 1999. Nada malu pa su debut.
Pero e ulandes no ke pa Walter Smith, e treiner aktual di e tim eskoses, ta pone e logro ei un banda. Smith ta bai pa kuater título den temporada i su chèns grandi ta presentá djarason den e final di Kopa UEFA kontra e tim Zenit di Advocaat.
Advocaat a bai di Rangers na 2001 i e ta dilanti e posibilidat di daña e ilushonnan di su eks ekipo.
“Lo sera un sírkulo”, Advocaat a bisa. M’a bisa for di komienso ku lo mi ke enfrentá Rangers den e final i parsemi fantástiko ku lo ta asina”.
Zenit ta un ekipo ruso ku a perkurá pa e sorpresa grandi di laga na kaminda e todopoderoso Bayern Munich den semi final.
“Nos a superá atversarionan mas fuerte ku Rangers”, Advocaat a trese dilanti. “I nan a derotá rivalnan mas importante ku Zenit. Na e alturanan aki ya bo no por ta sinti bo mes nervioso. Bo mester sali pa hunga i pa gana”.
Zenit, buskando su promé trofeo europeo, a konta ku yudansa di outoridatnan di futbòl ruso ku a aplasá nan kompromisonan den liga lokal ku bista riba e final.
Advocaat por a hiba e ekipo pa su Ulanda natal, kaminda djasabra nan a empatá 2-2 ku AZ Alkmaar den un wega amistoso.
E otro banda dje medaya ta bini di Rangers, ku a risibí un trato hostil di parti di Liga Premier eskoses. Rangers mester a hunga djasabra kontra Dundee United, ademas di un otro wega promé ku djarason.
Pero nan a suma tres punto den tur dos punto pa keda na kuater di e lider Celtic faltando dos fecha.
E ekipo di Glasgow no a skonde su frustrashon pa e poko solidaridat pa aliviá su programa di weganan dilanti su promé final europeo for di dia ku nan a gana e Rekopa ku no ta eksistí mas na 1972.
“Ora liga pidibo pa hunga kuater wega den un siman, tur hende ta kuminsá hari, nan ta hasi chèrchè di nos”, e bolante di Rangers Lee McCulloch a bisa. “E ta un kos ridíkulo. Pero mester hunga e weganan i gana nan”.
Esun di Zenit lo ta e di 64 di un temporada ku a kuminsá na ougùstùs ku e etapa previo di Liga di Kampionnan. Awor ta bini sinku wega den ménos di dos siman i den tres kategoria.