ORANJESTAD – Diasabra otro siman, 24 di mei, Quota International of Aruba ta organisa su seminario anual, cu e tema “Leadership as a habit of mind” cu dr. Barbara Mackoff. Barbara Mackoff, autor di diferente boeki, y alaves un coach riba tereno di liderazgo, lo elabora riba con pa pensa y actua como lider den tur situación.
Mas y mas nos tur ta bira mas conciente di e necesidad di liderazgo den nos bida personal y profesional. Esaki ta importante den companíanan, gobernación, na nos scolnan, den nos hogarnan y pa nos mes.
Diferente companianan, tambe na Aruba, ta mira tipo di seminario nan asina como un posibilidad pa brinda un training na empleadonan. Barbara Mackoff ta duna trainingnan di liderazgo na diferente organisacion rond mundo, incluyendo IBM, AT&T, PepsiCo, Dupont, Boeing y Nintendo.
Mirando esaki hopi hende ta hasiendo uso di e oportunidad aki cu Quota ta brinda na Aruba.
E seminario no ta solamente pa esnan cu ta trahando den posición di lider actualmente. Tur hende ta lidera na un of otro momento, den famia, den organisacionan, den gruponan deportivo, etc. Barbara Mackoff lo papia tocante 5 habito of custumber mental cu ta caracterisa e bida y trabow di lidernan exepcional.
E ta bin prepara pa mustra nos e fuente di nos propio potencial pa liderá. E lo inspira nos na un manera cu lo guya nos den e manera cu nos ta pensa y responde na nos desafionan den nos bida diario.
E seminario lo tuma lugar otro siman dia 24 di mei 2008, di 1.00 p.m. te 6.00 p.m. na Renaissance Conference Center. Ticketnan ta na benta serca miembronan di Quota, y na Giselle Department Store, Antraco Bookstore, Mrs. Minute y T.H. Palm & Co. pa Afl. 75,00.
Benta di e ticketnan ta bayendo hopi bon, y ainda tin algun ticket disponible. Aña pasa e seminario di Quota tawata ‘sold out’ y diferente persona cu a warda te na ultimo a keda decepciona.
No laga esaki pasa cu bo e aña aki, y busca bo ticket trempan.