WILLEMSTAD – Polis a detené un shofùr di bùs awe mainta, na momentu ku e tabata bayendo Konseho Insular huntu ku otro shofùrnan di bùs. E presidente di e bònt di shofùrnan di bùs, Andres Everitz, a bisa LA PRENSA ku e shofùr tabata kumpliendo ku un derecho pa bishitá un reunion públiko. Polis ta bisa ku el a opstakulisá tráfiko.
E shofùrnan di bùs awe mainta lat a disidí ku nan ta bai Konseho Insular kaminda tabatin un reunion públiko ta tumando lugá. E reunion tabata pa atendé e destinashon di e área di Rif. Everitz a bisa ku nan a bai Konseho Insular pa informá kon ta pará ku e tópiko oumento di kombustibel, pasó nan ta haña ku e tópiko akí mester ta riba agènda pa atendé ku urgensia. “Nos a bai awe mainta pasó nos ke sa ki dia ta atendé e punto akí. Ta nos derechi komo shofùr di bùs pa informá ki dia nos problema ta haña atenshon. Ta p’esei nos a bai Konseho Insular. Na momentu ku nos a yega den e área di Pietermaai, ya polis a sera kasi tur entrada pa drenta Punda. Tantu e kaya di Bestuurscollege i esun di Konseho Insular tabata blòkiá i diferente polis i funshonario di SKS tabata pará na e blokeo.
Pa motibunan te ainda deskonosí, polis a detené un miembro di direktiva di STU, bisando ku el a stroba tráfiko.”
Everitz a bisa ku ya a yama tur otro shofùr di bùs pa nan tambe bin na e sitio, pasó miéntras polis no laga nan kolega den libertat nan lo no bai for di kaminda nan ta. E malkontentu bou di e shofùrnan ta pa motibu ku Gobièrnu a oumentá e tarifa di bùs sin ku e shofùrnan a pidi esaki. E shofùrnan ta alegá ku di e manera akí Gobièrnu ta instigá pueblo kontra shofùrnan di bùs dor di oumentá e tarifa sin ku e shofùrnan a pidi pa e oumento. Finalmente Everitz a bisa ku nan tabatin otro alternativanan ku por a suavisá e subida di disel. Entre otro por a nivelá e tarifa di plachi di number. Segun Everitz, un vehíkulo ku ta usa gasolin ta paga ménos pa number di outo ku un vehíkulo ku ta usa disel. Tambe e seguro pa un bùs ku ta usa disel ta 4 mil i piku florin pa aña kompará ku un 300 i piku florin pa un vehíkulo ku ta usa gasolin.