WILLEMSTAD – Tin diferente bòrchi di tráfiko destruí último dianan. Ounke ku e fenómeno akí ta konosí riba kareteranan di Kòrsou, último dianan e bòrchinan destruí a bolbe hala atenshon. Riba e portada di LA PRENSA di ayera nos a pone atenshon kaba na e fenómeno akí.
No ta promé bia ku tin diferente bòrchi di tráfiko destruí na mes momentu. Regularmente por nota e bòrchinan akí na diferente sitio rònt Kòrsou. Sin embargo den e último dianan esaki a hala èkstra atenshon. Den hopi kaso e bòrchinan akí ta kibra ora outomobilistanan dal den nan. Tin kaso tambe kaminda vandalismo ta kousa di e destrukshon. Pero no opstante e kousa, DOW ku ta responsabel pa e bòrchinan akí, ta tarda hopi pa drecha e daño i remplasá e bòrchi destruí.
Lei ta stipulá ku esun ku destruí e bòrchi ku su vehíkulo, ta responsabel pa e daño kousá na e mobilario di kaya. Den e kaso akí polis tin ku traha un prosèsverbal, loke lástimamente kasi nunka ta sosodé. Outomobilistanan ku okashoná e daño, den kasi tur kaso ta kore bai. Ora ta trata di vandalismo, naturalmente nunka no tin polis den serkania. Malechornan ta wak ora kosta ta liber pa nan kometé nan fechoria.
Di tur manera ta bon pa DOW ta mas atento ora deskonosínan destruí e bòrchinan i sòru pa drecha esakinan mes ora. Falta di un bòrchi fásilmente por kousa un aksidente, ya ku e outomobilista ku no konosé e sitio no ta haña e atvertensia ku e bòrchi tin ku duna. No mester lubidá ku tin hopi turista ku ta hür outo i kore rònt na sitionan ku nunka ántes nan a kore. Pa e hendenan akí ta importante pa tin e bòrchinan di tráfiko pa indiká situashonnan di preferensia òf krusadanan peligroso.
Algun aña pasá 4 ulandes oropeo a muri na e krusada, kaminda ántes tabata Marchena Hardware na Beurs. Nan tabata biniendo for di e parke di abestrus i na e krusada nan a subi kaminda grandi sin duna preferensia na un dòmtrùk ku tabata aserkando e krusada. Na e krusada no tabatin un bòrchi ku ta indiká ku mester stòp.