WILLEMSTAD – Un grupo representando Plataforma Otrobanda, a reuní awe mainta dilanti di e edifisio di Konseho Insular. Pa ekspresá nan malkontentu ku e manera ku gobièrnu ta atendiendo ku nan Plan Mayó, nan a parti foyeto riba kua nan a ekspresá nan malkontentu.
E grupo a bai na e sala di reunion di Konseho Insular kaminda awe mainta diputado Anthony Godett mester a kontestá preguntanan relashoná ku e proyektonan di de Veer i Cayco. E dos proyektonan akí ta punto di diskushon últimamente, ya ku tur e dos partidonan tin un plan pa desaroyá e área di Rif. De Veer ta bisa, ku el a entregá su plan for di novèmber aña pasá, miéntras tin indikashon ku diputado Godett a negoshá ku Cayco i ku e negosiashonnan akí a konkluí entretantu. Di otro un banda tin e gruponan di Otrobanda ku a presentá un Plan Mayó for di aña 2000 i nunka a risibí un kontesta.
Riba e foyeto ku nan a parti awe mainta nan ta bisa: “Tereno di gobièrnu ta propiedat di pueblo i ku desaroyo di tereno di gobièrnu mester benefisiá pueblo. Esei ta posibel usando ingredientenan simpel manera 1). Krea espasio i oportunidat pa tantu e desaroyadó grandi komo invershonista chikí, pero tambe pa e bendedó humilde di kaya i tur otro gremio di komunidat. Laga tur partisipá den e posibilidatnan pa krea trabou i entrada ku e área ta ofresé: un ekonomia partisipativo.
2). Krea un ambiente di siudat ameno den un desaroyo abierto kaminda tur hende, tantu lokal komo turista, por sirkulá libremente. Ke mèn un área sin muraya será: un siudat habrí.
3). Krea un konsentrashon armonioso di turismo, komèrsio, kultura, rekreashon i bibienda: diversidat humano.
4). Protehá i inkorporá e kalidatnan di kosto di bida, awa i naturalesa di ref di un manera duradero, komo parti di e eksperensia úniko ku e área ta brinda: medio ambiente.
Ta esaki ta e ingredientenan básiko di Plan Mayó pa Área di Rif. Gruponan di Otrobanda a ofresé i presentá Plan Mayó na Bestuurscollege i Konseho Insular vários biaha, kuminsando for di 17 di yüli 2000. Esaki a sosodé ku sosten di hopi otro organisashon komersial, sosial, kultural i ambiental.
Te dia di awe no a risibí ni sikiera un konfirmashon ofisial di eksistensia di e plan akí. Den notisia ku ta sali últimamente atrobe por weta kon no ta konsiderando un desaroyo partisipativo, balansá i duradero. Simplemente, polítiko nan ta komplasé e desaroyadó grandi, lagando pueblo afó.”