WILLEMSTAD – Un grupo di akshon Bèlga ta eksigí pa prohibí plantamentu di palu kantu di kaminda. E eksigensia a bin despues di e morto trágiko di e futbolista Francois Sterchele. Sterchele a dal ku su outo den un palu riba e kaminda E34.
E grupo di akshon ta eksigí pa kita e palunan for di kantu di kaminda òf pa pone nan patras di ‘vangreel’. Esaki lo evitá hopi morto den tráfiko. “Un palu di 15 cm diki lo no kibra fásil ora un vehíkulo dal den dje. Konsekuentemente esaki lo kousa daño konsiderabel na e vehíkulo i den sierto kaso morto di esnan den e vehíkulo”, e grupo di akshon a skibi den un komunikado.
Pa loke ta trata kareteranan nobo, e grupo ta eksigí pa prohibí plantamentu di palu kantu di e kareteranan akí. Finalmente, gobièrnu mester laga kap e palunan ku ya ta plantá kantu kaminda riba otro kareteranan, òf kita nan i planta nan di nobo tras di ‘vangreel’, segun e grupo. E kustumber pa planta palu kantu di kaminda ta data for di tempu di Romanonan. E palunan mester a sòru pa sombra i fresku pa e sòldánan ku tabata kana den desfile. Na Ulanda no ta eksistí un diskushon enkuanto palunan plantá kantu di kaminda. Al kontrario: Rijkswaterstaat a laga planta diferente sorto di palu kantu di e kaminda prinsipal A50, pa asina midi kua di nan ta saka mas tantu ‘fijnstof’ i CO2 for di airu.

Kòrsou

Akí na Kòrsou no tabatin morto den tráfiko último añanan, kaminda palunan kantu di kaminda a hunga un ròl. Loke si a kousa diferente morto tabata kuránan di kas trahá di blòki. Den terminologianan di siensia di tráfiko ta papia di ‘fixed hazardous objects’. Esakinan ta ophetonan duru kantu di kaminda ku por forma un peliger pa outomobilistanan den kaso di un aksidente.
Entre 2005 i e aña akí un total di 10 persona a muri den tráfiko a konsekuensia di un opheto duru kantu di kaminda. Na 2005 Kevin Traynor a muri, ora el a dal ku su vehíkulo den un palu di lus na altura di Kleine Berg. Na 2006 Jose Elisa a muri ora el a dal ku su outo den un palu di lus na altura di e kuebanan di Hato. Na 2007 tabatin un total di 6 persona ku a muri a konsekuensia di un opheto duru kantu di kaminda. Raynathan Sambo a muri ora el a dal ku su motosaikel den un staka di heru kantu di kaminda na altura di Kas Abou. Jean de Lira a muri ora el a dal ku su outo den un kurá di kas di blòki riba M.L.K. Bouelevard. Jose Bonifacio a muri ora el a dal ku su outo den un muraya di blòki na altura di Mementos riba Schottegatweg Oost. Anthony Eustatius a muri ora el a dal ku su motosaikel den un palu di lus na altura di Suvek riba Sta. Rosaweg. Ashel Martina a muri ora el a dal ku su outo den un kurá di kas di blòki. Bernadina Cijntje a muri ora un konvoi ku ta transportá turista a alkans’é i peg’é den un palu di lus den Oranjestraat. E aña akí Keesje Lake a muri ora e outo ku e tabata sintá aden a dal den un kurá di kas di blòki riba Cabo Verdeweg, i Rafaelito Martina a muri ora el a dal ku su outo den un palu di lus i un muraya di kas di blòki na altura di Tera Cora.