Prof. Dr. Mr. Ir. Ing. Drs. Lorito (MA, MBA, MSc. MURP. SLURP. WHATEVER.) ta yama tur hende un felis djamars. Awe ta dia 13, por lo general konsiderá pa diferente hende komo un dia di suerte. Otronan ta konsider’é un dia di mala suerte. Laga nos sa kiko bo ta pensa!
*********
Nos a kòrda riba masha hende ku nos a atvertí pa no atendé ku sierto figuranan, pasobra nan ta pega ku nan breu. Bicho tambe a haña i otronan tambe ta na kaminda pa haña. Tin hende masha kobarde ku tin boka masha grandi, pero ora bo konfrontá nan, nan ta baha nan kara. Awor nan ta kana bisa ku Bicho a subi preis. Bicho a kontestá nan bèk: mi no ta doño di niun pòmp!
*********
Lorito ta pronostiká for di awor aki, ku pronto e próksimo figura lo haña su lès. E lo haña su lès, pasobra Lorito si ta kere ku rosea di un grupo kolektivo ku bo ta hasi daño, sigur si nan no por defendé nan mes, lo gara bo tambe. Loke nos ta atvertí tambe ta, pa no laga tin un interkambio físiko den e kaso aki. Tin hende ku no ta tuma i nan tin nan mes manera pa atendé nan asuntunan. Ojo!
**********
Na Saba ayera mainta ta via via tur hende a tende ku preis di produktonan petrolero a subi drástikamente. Einan no tabatin asuntu di konsultá ni nada di komishon. Ora e hendenan a lanta nan a tende ku preis a subi. Nos ta menshoná e asuntu aki djis pa hende komprondé, ku nos ta bendishoná ku aki nan sikiera por papia riba e asuntunan aki promé. Asina mes tin hende ta reklamá! Por sierto ku preis di gasolin a subi te na 2.41 sèn pa liter, miéntras ku preis di gasoil a subi te na 2.30 pa liter. E isla ta sklama, pero nan no tin Komishon di Energia!
*********
Na Sint Maarten nan a atvertí pa oumentunan drástiko for di awor. E korant The Daily Herald den un editorial awe a konkluí ku no tin moda di hasi. “The bottom line is that there are no quick-fix solutions and that people are going to have to deal with the fact that their money buys them less than it used to. Government and the private sector could be of great assistance, however, by providing more information and training on how to manage budgets and save cost where possible”, asina e korant ta bisa.
*********
Aki na Kòrsou, algun sabí ta pretendé ku por otro. Es mas, nan kier sa, ku nos ta ainda den tempu di kouchi boulo, kaminda tur hende ta kere loke nan ta bisa. Awe dia mayoria hende ta konektá ku mundu, sea via di TV, Internèt òf di otro forma, ta masha bon informá i nan por opiná pa nan mes.
*********
By the way, nos a mira un hende ku tin pia di krus duru tene dilanti den e protestanan. Kon un hende ku ta kere den Señor por pèrmití un lider (su lider!) papia asina di un próhimo? Laga pia di krus bai shon!
*********
E desishon di BAB pa stòp ku e aktividat di Dia di Mama tabata komentario tur kaminda. Lorito a bisa na diferente okashon, ku nos no ta kere ku BAB mester ta den e tipo di aktividatnan pa noble ku e kousa ta. BAB ta kana kontrolá tur aktividat i nos pregunta ta sigur relevante: ken a kontrolá e buzonnan di BAB. Einan tambe tin hende a bin kita e buzonnan i pone otro?
*********
Un otro punto ta, ku nos no ta kere ku un entidat manera BAB mester kana buska spònser pa su aktividat. No mester krea ni sikiera e impreshon ku si bo koperá ku sponsorship BAB ta mas fleksibel ku bo. Ademas e kaso di DARE no a yuda imágen di BAB. Lo ta bon pa e shou sigui, ku e mesun entusiasmo, pero ku un grupo independiente for di BAB. Ta djis un rekomendashon!
*********
Nos ta keda te aki awe. Nos lo bula awe riba Stadhuis i nos ta pendiente pa duna bo tur detaye. Kòrda riba nos adrès: loritotabula@yahoo.com
Te mañan ku Dios su poder!