WILLEMSTAD – Diputado di Infrastruktura Anthony Godett a sigurá awe mainta ku tur konseho ta kla pa desaroyo di e área di Rif. “Nos tin e konsehonan di e servisionan korespondiente, den e kaso aki di Domein, DROV i AJZ”, asina e diputado a bisa.
E diputado a anunsiá ku e lo biaha pa Aruba e siman aki pa bishitá Meta Corp. i mira di serka e desaroyonan. Na Aruba e lo topa tambe ku representantenan di Grupo Cayco, segun el a informá den Konseho Insular. E diputado a bisa ku e no tin ningun problema ku Meta Corporation. Ya kaba e tabatin kontakto ku Eduardo de Veer, presidente di e Grupo ku ta desaroyando parti di e área di Rif. “E kontakto ku De Veer tabata ameno. Den 17 aña den polítika ta di dos bes ku mi tabatin kontakto ku De Veer. Pa bisa ku mi ta kontra De Veer no tin base”, asina diputado Godett a bisa.
E diputado a rechasá tambe alegashonnan, den sentido ku tin kosnan straño rondó di e grupo Cayco. “Ora ta trata di un proyekto di 150 mion dollar i un polítiko di pueblo i ku ta traha pa pueblo bin ku un idea semper ta bin ku kuestionamentu. Ta di kon mester ta asina?”, asina diputado Godett a puntra.
E diputado tabatin krítika fuerte riba sierto medionan di prensa pa e manera ku nan a bin ta publiká riba e kaso aki. Prinsipalmente e manera ku algun medio a hinka e proyekto di Cayco den un ambiente “dudoso” a pone ku e mandatario a kunsumí masha. El a bisa bon kla, ku e no ta bai aseptá e tipo di kosnan aki mas. “Mi a bisa for di desèmber, ku mi no ta aseptá mas ku ta mancha mi nòmber. Esun ku hasi esei mester karga e konsekuensianan”, asina e diputado a bisa.
Por sierto ku e diputado a anunsiá, ku e mes lo paga su gastunan na Aruba. “Mi no ta aseptá nada ni di Meta ni di Cayco”, asina e diputado a bisa, splikando ku tur kos lo sali for di su mesun saku.