WILLEMSTAD – Ámbos Gobièrnu a ekspresá satisfakshon ayera despues ku un delegashon ministerial di Antia a topa ku un delegashon ministerial di Aruba pa atendé diferente punto pendiente. Ta e promé reunion ku ta tene na nivel di e Konseho di Koperashon Ministerial for di febrüari 2006. Diferente motibu a pone ku no por a reuní, anke e Areglo di Koperashon ta bisa bon kla ku e dos Gobièrnunan mester reuní kada 6 luna.
P’esei no ta nada straño ku e agènda di ayera a konsistí di 19 punto.
Promé minister di Antia Emily de Jongh-Elhage a bisa ku e hechu ku Aruba a bin ku 5 minister ta un indikashon di e seriedat di e enkuentronan aki i puntonan ku ta pendiente pa atendé. Segun e mandatario, por konkluí ku e relashonnan entre e dos paisnan ta kordial i tur dos a ekspresá e deseo pa atendé puntonan di atenshon den forma mutuo i den konsulta ku otro. E relashonnan a bira ménos bon resientemente despues ku un mandatario antiano a ekspresá krítika kontra Gobièrnu di Aruba. Aruba no a gusta e remarkenan i a kanselá e sita anterior. Pa awor aki ta parse ku tur kos a plakia. “Despues di e reunion aki no por konkluí ku nos relashonnan ta kordial. Esei no por ta otro si konsiderá e lasonan kultural i familiar históriko ku tin entre e dos paisnan”, asina e mandatario antiano a bisa.
Pa loke ta trata e puntonan ku a deliberá riba nan, e dos mandatarionan a bisa ku lo duna sosten na otro pa loke ta trata e kambionan estatal ku ta na kaminda. Promé minister Nelson Oduber a anunsiá ku pa otro aña Antia no por konta mas ku sosten finansiero di Aruba pa Fondo di Solidaridat. Esei ta relashoná ku e hechu ku otro aña Aruba no por konta mas ku yudansa finansiero ulandes. Promé minister Oduber a bisa ku for di 1986, Aruba a kontribuí ku mas ku 100 mion den e fondo aki ku a establesé na 1986, tempu ku Aruba a haña status outónomo pa yuda e islanan mas chikitu di Antia.
Pa loke ta trata e parti di atmishon di profeshonalnan antiano na Aruba, promé minister Oduber a bisa ku lo bai atendé e punto aki. Na Antia pa algun aña kaba tin reklamo riba e manera ku ta atendé profeshonalnan antiano na Aruba. Miéntras ku na Antia no tin restrikshon pa nan drenta, na Aruba si esei ta e kaso. Esei ta konta entre otro pa músikonan for di Kòrsou (Antia). Promé minister Oduber a bisa ku lo bai atendé e asuntu aki ku DIMAS, e entidat di atmishon i ekspulshon ku Aruba a establesé.