WILLEMSTAD – Fundashon pa Konsumidó a konstatá ku preisnan pa periodo di risibimentu ta varia di supermerkado pa supermerkado. Algun kaminda e diferensianan ta sustansial, asina Fundashon pa Konsumidó a konstatá den su último investigashon. Un biaha mas a bai e petishon na komunidat pa wak tur artíkulo di serka promé, kompará preis pa despues numa kumpra.
Pa e temporada di risibimentu aki Fundashon pa Konsumidó a hasi un komparashon di preis di e produktonan for di e makutu di risibimentu. For di e investigashon aki a resultá ku Mangusa Rio i Mangusa Seru tabatin mayoria produkto na un preis mas barata, miéntras ku Alves Supermarket a resultá e supermerkado mas mihó surtí. Manera ta kustumber Fundashon pa Konsumidó a pidi Servisio pa Asuntunan Ekonómiko, hasi e kòntròl di preis riba produktonan den nos makutu. E produktonan ku a ser kontrolá mayoria ta ingredientenan òf produktonan ku no ta kai bou di preis máksimo stipulá dor di Gobièrnu. Fundashon pa Konsumidó na su turno a analisá e resultado di e investigashon i a pone tur e preisnan den un tabèl. Durante e investigashon aki a hasi un komparashon di preis i no a tene kuenta ku e kalidat di e produkto. Ta p’esei Fundashon pa Konsumidó ta hasi un apelashon na tur konsumidó pa wak bon promé ku nan kumpra. Konsumidó, e situashon aktual ta eksihí pa bo bira mas konsiente. E kòntròl di preis aki ta yuda bo usa bo sèn na manera mas efisiente. Kompará preis i kalidat, kòrda wak por ehèmpel fecha di vensementu di e produkto i tambe si e no ta daña promé ku kumpra. E aktividat di kòntròl a tuma lugá di 10 pa 24 di aprel 2008. Na e okashon aki Servisio pa Asuntunan Ekonómiko a bishitá 21 diferente establesimentu. A kontrolá preis di un kantidat di 134 produkto ku nos a pone den e makutu di produktonan pa risibimentu. Tambe a kontrolá sierto bebida. E kategoria di e produktonan ta: suku brùin, tarwemeel, baking powder, cacao, aroma, ingredientenan pa bolo pretu, suku pa blancha bolo i bebida.
E resultado di e análisis ta masha interesante pa sa:
E 2 supermerkadonan ku a sali ku mayoria di e produktonan for di nos makutu ku un preis mas barata ta e supermerkadonan ku mesun nòmber Mangusa Rio i Mangusa Seru.
Na momentu di e kòntròl Alves Supermarket tabatin 127 produkto for di e makutu den su rèkinan o sea mayoria di e ingredientenan pa bolo, siguí pa Mangusa Rio ku 118 i na di tres lugá Ossais Supermarket ku 116 produkto.
Remarkabel ta e diferensia di preis grandi entre e supermerkadonan di mas barata kompará ku otronan. Algun ehèmpel ta bòter di Scotch Special 1.5 liter ku na Shop & Save ta kosta ƒ27.41, miéntras ku na Colon Supermarket e ta kosta ƒ46.80, pues ƒ19.39 mas karu. Na Esperamos Supermarket un bòter di Whisky Red Label 2 liter ta kosta ƒ59.95, miéntras ku na Alves Supermarket e ta kosta ƒ79.80, un diferensiá di f19.85. Notabel ta e diferensia grandi di preisnan di ingredientenan pa bolo (fruta seku). Por ehèmpel na Centrum Mahaai bo ta paga ƒ27.22 pa un kilo di mangel dushi, miéntras e mesun kantidat aki ta kosta ƒ44.00 na Arti’s Otrobanda. Na Exito Supermarket un kilo di kashupete hinté ta kosta ƒ19.50 miéntras e mesun kilo aki ta kosta ƒ39.75 na Centrum Mahaai, pues ƒ20.25 mas karu. Na Exito Supermarket e konsumidó ta paga f 19.50 pa un kilo di papaya miéntras ku na Centrum Piscadera e ta paga fl.7.10 ku ta fl.12.40 mas barata. E supermerkadonan kaminda e kòntròl a tuma lugá tabata: 2000, Albert Heijn, Alves, Arco Iris, Arti’s Otrobanda, Bon Bini, California, Centrum Mahaai, Centrum Piscadera, Colon, Esperamos, Exito, Goisco, Mangusa Rio, Mangusa Seru, Ossais, Pita Maripampun, San Pedro, Shop & Save, Strada i Vreugdenhil.

Nota Speshal

Durante selebrashon di e fiestanan di Promé Santu Komunion i Konfirmashon ta dòrna mesa ku hopi bolo pretu den forma di Krus, Kurason i Mitar Luna simbolisando Fe, Speransa i Karidat. Tambe tin e buki komo símbolo di e Beibel. Tur e dòrnamentu aki tin su signifikashon i balor religioso, pero si traha tur e símbolonan aki na bolo, e gastu ta bira hopi grandi. Segun informashon ku nos a kompilá pa stipulá preis di bolo, mayoria trahadó di bolo ta usa e fórmula ku ta multipliká e gastu di ingredientenan ku 3. E fórmula aki ta sali hopi kostoso. Ta p’esei Fundashon ta spera ku e informashon aki lo yuda e konsumidó saka e sòm kuantu e tradishon di bolo aki ta bai kosta i si ta bale la pena pa laga traha tantu bolo asina. Pa baha e gastunan nos ta sugerí pa traha imitashon di bolo ku foam nèchi dòrna i blanchá, kaminda e resultado i efekto ta mesun kos ku e bolo original ta duna. Tambe por traha imitashon di bolo pretu ku ta mas preimu ku fruta kurtí. Ta p’esei ta di suma importansia pa hasi uso di e tabèl ya bo por haña un bista amplio na kua supermerkado e diferente produktonan ta mas barata i mas karu. For di e tabèl aki bo mes por traha bo makutu tambe. Por ehèmpel ku ta dies òf binti produkto bo tin ku kumpra, bo ta kue e preisnan di e tres supermerkadonan ku ta keda den bo bisindat i kompará nan pa asina bo ta haña un bista na unda bo ta kumpra pa ménos sèn.
Fundashon pa Konsumidó ta duna algun tep importante pa trahamentu di bolo.
 Paga tinu ora ta kumpra hariña na paki pa kue esun ku ta bisa “all purpose” pa no bruha kue esun di traha pan.
 Manteka dushi ta duna e bolo un smak èkstra suave i dushi.
 Pa bolo di frishidèr ta rekomendabel usa manteka dushi en bes di margarina ku ta mas pisá.
 Evitá di pone hopi bebida i stropi den e bolo pretu pa e no “choria” i basha líkido.
 Batrei di por ehèmpel 3 dèk no nesesariamente mester ta kompletamente di bolo, por traha 2 dek di foam dòrná ku por yuda baha gastu, anto e bunitesa di e mesa tei tòg.
 Saka e preis di un liber di bolo segun e fórmula ku ta wòrdu usá i wak si bo pòtmòni por pag’é.
 Pa baha gastu por traha imitashon di bolo pretu (mas preimu i ménos fruta kurtí) òf por traha imitashon di bolo ku foam dòrná i blanchá masha bunita.
 No bai tras di tradishon, no ta paso ta fiesta di risibimentu mester bai traha masha hopi bolo. E batrei por ehèmpel ta despues di fiesta ta kòrt’é pues bo por traha un parti di foam i baha e gastunan.
 Tempu ta birando dia pa dia mas difísil, ta p’esei ta importante tuma desishonnan konsiente i responsabel segun bo forsa. Kòrda ku bo pòtmòni ta bo responsabilidat.
Tur interesado ku kier haña kopia di e tabèlnan aki por tuma kontakto ku ofisina di Fundashon pa Konsumidó na telefòn 462-6666 òf via email funpakon@onenet.an. Tambe por pasa personalmente na De Ruyterkade # 53 na Punda.