Ta studiando posibilidat pa usa kachó tambe na Bon Futuro


WILLEMSTAD – Resientemente minister di Hustisia di Antia David Dick a risibí un presentashon di e agentenan i kachónan ku Duana di Antia Ulandes a entrená, spesialmente pa detektá arma, droga, plaka i tambe eksplosivo. Duana a ofresé un treining di 13 siman na kual dos miembro di Kuerpo Polisial di Aruba i unu di Sürnam tambe a partisipá. Esaki den kuadro di e koperashon ku ta eksistí entre Ministerio di Hustisia di Antia Ulandes, Aruba i Sürnam, na kual koperashon Duana di Antia tambe ta duna sosten.
Kada 6 luna e Ministernan di Hustisia di e respektivo paisnan ta bini huntu den un asina yamá “Tripartite” pa repasá akshonnan ku ta resultado di e akuerdo di koperashon ku nan a firma i asina profundisá i amplia e koperashon aki. Durante e enkuentro aki, diferente aspekto tantu riba tereno operashonal komo tereno di maneho ta keda diskutí, ta analisá desaroyonan ku a tuma lugá durante e último lunanan i ta traha palabrashonnan nobo. E siguiente Tripartite ta tuma lugá na Sürnam na kuminsamentu di yüni próksimo.
Duana ta kai bou di e Ministerio di Finansa i tin un ròl di kontrolá tur traspaso di nos fronteranan di produkto legal i ilegal, prinsipalmente na hafnan i aeropuertonan di Antia. Ademas Duana ta investigá esnan ku ta hasi nan mes kulpabel na aktonan kriminal riba e tereno di importashon, eksportashon i trafikashon di entre otro produktonan ilegal manera arma, droga, plaka i eksplosivo. Pa tal motibu su sosten na e koperashon ministerial aki ta di sumo importansia. Duana pa basta aña huntu ku entre otro Kuerpo Polisial, Warda Kosta, KMAR i otro instansianan ta koperando pa redusí e tipo di krímennan menshoná.
Duana ta trein kachónan pa vários aña kaba i nan ta dunando hopi bon resultado. Atrobe un bon trabou a ser hasí pa e instruktornan di Duana i tur e personanan ku a haña entrenamentu a pasa nan eksámen ku éksito. Pendiente finalisashon di e struktura, organisashon i e trabounan preparatorio pa por instalá ofisialmente e Brigada di Kachó di Kuerpo Polisial na Kòrsou. Duana a duna nan kontribushon pa entrená e 2 agentenan polisial. E entrenamentu a tuma lugá den Haf, na Hato i tambe riba e tereno na Sapaté ku a wòrdu trahá espesialmente pa trainingnan di kachó.
Den kuadro di e koperashon ariba menshoná, Ministerio di Hustisia di Antia Ulandes a opsekiá Ministerio di Hustisia di Sürnam i Aruba un kachó. Durante e temporada menshoná a trein e agentenan kon pa hasi uso di e kachónan pa tene kòntròl, pero tambe pa nan por obedesé nan hefe. E kachónan a siña detektá sierto ophetonan ilegal na un forma pasivo i aktivo, apesar ku esakinan ta skondí, bon empaketá òf bon seyá.
Pa motibu di bishita di trabou den eksterior no tabata posibel pa minister Dick presensiá finalisashon di e treining i entrega ofisial di e sertifikadonan. Pa tal motibu Duana a organisá un demostrashon spesial pa minister Dick na Swissport na Hato, kaminda ku éksito e kachónan entrená a demostrá nan abilidat pa detektá e ophetonan prohibí pa importashon i trafikashon.
Na inisio di e demostrashon, entrenadónan profeshonal di kachó di Duana a duna minister Dick un splikashon di e método ku nan ta usa pa entrená kachó i esnan ku mester hasi uso di e kachónan. Despues di e parti aki, algun di e agentenan a duna e demostrashon.
Tur agente polisial a gradisí minister Dick pa su inisiativa i koperashon i a ekspresá nan gratitut tambe pa e bon trabou ku Duana i su ekspertonan riba e tereno aki a hasi.
Minister Dick ta konvensí ku uso di kachó pa yuda kombatí kriminalidat ta bira mas i mas nesesario i útil. E kachó ta un medio ku fásilmente por ser usá pa tene kòntròl i pone òrdu. Pa tal motibu minister Dick a inkorporá uso di kachó den maneho Hudisial i a laga konstruí un fasilidat spesialmente pa entrenamentu di kachó.
Pronto lo inisiá ku kursonan pa algun agente polisial di Kòrsou ku lo keda prepará pa e tarea aki. Tambe ta studiando e posibilidat pa kuminsá ku preparashonnan pa konstruí sierto fasilidatnan na Bon Futuro pa entrenamentu di agentenan di siguridat na e instituto aki. E kachónan bou di guia di e agentenan lo por prevení, kontrolá i detektá entrada di kualke artefakto òf otro supstansia ku ta prohibí pa drenta prizòn fásilmente.
Despues di e tremendo presentashon, minister Dick a gradisí tantu e direktor di Duana señor Julian Lopez-Ramirez komo e entrenadornan pa nan koperashon i bon trabou. Minister a trese dilanti, ku ta su deseo pa sigui ku e bon koperashon ku ta eksistí entre e instansianan hudisial i Duana i tambe entre e paisnan ku a partisipá. Tambe minister Dick a felisitá i gradisí e agentenan pa nan partisipashon i e echo ku awor nan ta agentenan di Polis i Duaneronan sertifiká pa traha ku kachó entrená. Ku e konosementu aki e agentenan di Aruba i Sürnam ku lo hasi uso di e kachónan di polis i lo bai yuda kombatí kriminalidat den nan pais i tambe evitá di nan banda pa trafikashon i eksportashon tuma lugá pa un di e islanan di Antia Ulandes.
Riba e pòtrètnan por mira momentu ku e entrenadornan ta duna minister Dick un splikashon di diferente tipo di treining ku a tuma lugá i por mira demostrashonnan kaminda e kachónan bou di guia di nan agente ta detektá arma, plaka i droga.