ORANJESTAD- E servicionan di Cable TV of Aruba ta obtenibel na San Nicolas entrante diamars dia 13 di mei 2008 na e Teleshop di SETAR situa na entrada di e caya principal di San Nicolas.
Esaki sigur ta un bon noticia pa esnan cu ta residencia na San Nicolas pero tambe esnan cu ta biba y traha den cercania. SETAR a dicidi hunto cu e compania di Cable TV di Aruba pa trece e servicio y productonan den San Nicolas tambe.
Tur cliente di Cable TV of Aruba awor en adelante lo por haci tur nan pagonan, peticion pa instalacion nobo of upgrading di nan servicionan actual tanto pa Cable / Digital Cable y Cablenet den e pueblo di San Nicolas y tur otro servicionan tambe!
5 aña trahando como NV treciendo cambionan pa mehora
Cu celebracion di 5 aña como un compania SETAR por mira atras con den un forma hopi acelera diferente proyecto, servicio y cambionan a concretisa nan mes den e compania den su formato nobo.
Den e ultimo 5 aña pasa, SETAR a demostra di ta un compania continuamente inovativo, moderno y cu no ta riña pa cambionan cu ta bin den su direccion.
E clientenan por a nota e cambio y inovacion aki di inmediato na momento cu a tuma e forma di NV. A implementa e ONE STOP SHOPPING cu ta ensera cu tur producto y servicio ta obtenibel na tur Teleshop pa facilita e cliente tur servicio bou di un dak. A haci cambionan interno hopi drastico y por a mira esaki refleha den e sistema cu e trato tanto telefonico como personal cu e cliente.
Satisfacion di e clientenan na momento cu nan ta haya un calidad di producto excelente, bon servicio y na un bon prijs. Na momento cu a adkeri Cable TV of Aruba, SETAR a facilita y accelera e inovacion den e servicionan di Cable TV cual a culmina den e servicionan di Digital Cable y CableNet.
Debi na tur e desaroyonan rapido den tecnologia SETAR hunto cu Cable TV ta trece e servicionan aki San Nicolas honrando alabes peticion di clientenan, vocifera entre otro door di San Nicolaas Business Association na Cable TV.
SETAR ta trece e servicionnan di Cable TV of Aruba mas serca di su clientenan na San Nicolas y becindario cu ta cuadra principalmente cu e filosofia di SETAR pa trece tur servicionan cu e cliente ta desea bou di un solo dak.