WILLEMSTAD - Komishon di Bario di Wishi i Marchena ta hasi un apelashon na habitantenan di Marchena, pa koperá ku polis pa yuda solushoná e asesinato di djasabra último.
Ta trata dje asesinato di Melvin Kopra djasabra último, ku tabata un dia despues ku e víktima a sali for di prizòn.
Kenneth Valpoort, kordinadó general di e Komishon di Bario di Wishi i Marchena a splika LA PRENSA, ku entretantu polis a hasi un yamada na habitantenan di e bario ku a mira loke a tuma lugá. ‘Nan ta wòrdu supliká pa duna informashon na polis, pa di e forma ei yuda den detenshon di e kulpabel di e asesinato. E habitantenan mester yama e number anónimo di polis.’
Segun Valpoort, e Komishon ta lamentá e insidente masha hopi i no ta di akuerdo ku un hóben di bario ta wòrdu asesiná i tur hende ku sa algu, ta keda ketu.‘ E ta duna un imágen hopi robes, pasobra e ora ei por habri porta pa tur hende bin den bario i hasi manera nan ta haña ta bon. I tur hende ta keda ketu’. Ta p’esei, e komishon ta hasi un apelashon na tur hende ku a testiguá kiko a tuma lugá pa duna informashon na polis. ‘Nos ta na altura, ku no ta tur hende tabata gusta e víktima, pero e tabata un ser humano i komo tal e mester haña su honor, debí na e insidente trágiko ku a tuma lugá’. Segun Valpoort, esun ku ta kulpabel di e hecho aki su konsenshi mester traha kuné i pone ku e ta bai entregá pa haña su kastigu, no opstante e hecho ku tin indikashon ku un dia promé el a wòrdu maltratá.
Valpoort:’’E insidente aki ta destabilisá e desaroyo positivo ku tin aktualmente den Marchena’’. E kordinadó dje Komishon di Bario, a bisa di no ta spera ku e asesinato ta afektá e aktividatnan positivo den e bario. ‘No ta spera ku awor ménos hende lo bishitá e Dia di Bario di Wishi i Marchena ku ta den preparashon’, segun Valpoort.