WILLEMSTAD – “Ami no tin preferensha pa ni grupo Cayco, ni tampoko Meta Corporation. Loke ami ta na fabor di dje ta pa nos impulsá e desaroyo asina nesesario den e área di Rif pa kaba. Anto laga ta bon kla: no tin diferensha di opinion entre partidonan di koalishon riba e asuntu aki”, diputado Anthony Godett a deklará durante e reunion públiko di Konseho Insular pa atendé e asuntu aki.
Ayera e reunion públiko ku a kuminsá algun siman pasá kontinuá i tabata turno di diputado Anthony Godett pa kontestá e promé buèlta di pregunta ku miembronan di Konseho Insular a hasi riba e tema aki.
No ta un sekreto ku tin pensamentunan diferente den komunidat riba desaroyo di e área di Rif.
Diputado Anthony Godett a bisa ku el a ser aserká pa grupo Cayco, un grupo di Venezuela pa haña e tereno na altura di Rif pa konstrukshon di un proyekto turístiko multi mionario.
A bin resultá despues, ku Meta Corporation, ku ta finalisando konstrukshon di hotèl Renaissance na Rif, tambe tin interes pa haña e mesun pida tereno.
Durante e reunion di ayera, diputado Godett a mustra ku na aña 2003 Bestuurscollege a aprobá un plan maestro pa e área di Rif.
Na ougùstùs 2006, Federashon di Otrobanda a presentá su Plan Mayó. Na novèmber 2006 e grupo Gold Investments a presentá su plannan pa área di Rif. Bestuurscollege di e tempu ei a palabrá ku lo traha un plan maestro nobo pa área di Rif ku mester ta kla promé ku fin di mei 2007, pero diputado di Infrastruktura di e tempu ei, Charles Cooper a disidí ku tanten no tin e plan maestro nobo, lo usa e plan ku tabat’ei kaba komo punto di salida.
Ta a base di esei a huzga tambe e petishon di Gold Investments.
E tempu ei tabatin pues tres grupo ku nan ideanan: Gold Investments, grupo Cayco i tambe e grupo di e invershonista De Veer, esta Meta Corporation.
7 di novèmber di aña pasá tabatin presentashon di e plan maestro nobo pa área di Rif. Den e mesun luna ei tabatin presentashon di tantu Cayco komo Meta Corporation ku a divulgá nan plannan na Bestuurscollege.
Segun diputado Anthony Godett a revelá ayera, e servisio DROV ku ta instrumental den tipo di proyektonan aki, a indiká ku ta dia 11 di aprel di e aña aki numa, nan a tuma nota di interes i e plannan di Meta Corporation.
E mandatario a duna un splikashon kòrtiku di Grupo Cayco. Cayco ta para pa “Casas y Construcciones” i ta un grupo finansieramente fuerte ku ta aktivo den vários pais na mundu.
Manera ta konosí, a surgi frikshon serio entre diputado Anthony Godett i Meta Corporation, a base di sierto publikashonnan ku Meta Corporation lo a hasi na Aruba. Diputado Godett a disidí di kanselá un reunion anterior ku e tabatin ku e grupo algun siman pasá.
“Si bo no ke pa mi ataká, no ataká ami. No ataká un gobernante, pasobra e ta reakshoná. Ami sigur no ta tuma. Nos tur tin mester di otro, invershonista mester di gobièrnu, pero gobièrnu mester di nan tambe, pues laga nos trata otro den forma korekto,” diputado Godett a bisa.
Ainda no tin un desishon kiko ta bai pasa. Mañan, diputado Anthony Godett ta biaha pa Aruba (riba s mes gastu, manera el a anunsiá ayera) kaminda e lo reuní 4’or di atardi ku tantu grupo Cayco komo Meta Corporation. “Mi plan ta pa purba konvensé e dos gruponan aki a traha huntu. Si mi logra, tur hende lo tuma nota di esei. D tur manera, lo mi raportá bèk na Bestuurscollege”, segun e diputado di Infrastruktura. E reunion ta tuma lugá na Hotel Renaissance.
Dos moshon ku partidonan di oposishon a presentá na final di e reunion a ser rechasá. Ta trata di un moshon ku ta boga pa tene nos playanan aksesibel pa públiko lokal i un moshon pa kuido e palunan di mangel na altura di Rif mas tantu posibel. Konseho Insular a rechasá e dos moshonnan aki ku 9 voto kontra i 8 voto na fabor.