WILLEMSTAD - Un pais ku ta bankrut, ku no tin moda di muri, no por bai hunga San Nikolas, oumentando sueldo mínimo i introdusí tur sorto di medida. Di e forma aki parlamentario Hero Brinkman di Partij voor de Vrijheid durante e “mondeling vragenuurtje” semanal di parlamentu ulandes ayera.
E aktitut di e parlamentario aki ayera asta a okashoná sierto iritashon serka su koleganan.
Gobièrnu di Kòrsou a anunsiá den fin di siman un pakete di medida ku mester suavisá e impakto di oumento di preis di energia pa esnan di ménos rekurso den komunidat. Ta proba ku e grupo aki lo sinti e efekto di oumento di preis di gasolin, disel, awa i koriente mas fuerte ku otronan.
Entre otro a anunsiá oumento di sueldo mínimo ku 5 porshento i tambe un adaptashon chikitu pa esnan ku ta kobra ònderstant.
Tin eksperto ku asta ta konsiderá e oumento ku a anunsiá komo muchu tiki. Entre otro e partidonan polítiko agrupá den Aliansa Patriótiko tambe ta bisa ku e medidanan aki no ta sufisiente.
Pa Hero Brinkman sinembargo, e kos aki ta dispidimentu di plaka.
“Kon por ta posibel ku na Antia ta oumento sueldo mínimo? No ta Ulanda finalmente lo bai paga e oumento aki? Antia ta stens ku Ulanda ta karga e kos aki, siendo ku polítikonan di e islanan ta bibando den un ambiente di korupshon,” Brinkman a bisa.
Brinkman a bisa ku e tin sigur ku Antia ta konta ku ta Ulanda ta bai karga tur esaki, atraves di e promesa ku Ulanda lo pone 2.2 bion euro disponibel pa kanselá debe nashonal di Antia. Ami ta kansa di e situashon aki i mi ke sa kiko sekretario di Estado Bijleveld ta pensa. “Ami lo a preferá pa nos a usa e plaka ku nos ta duna Antia na kuido di nos grandinan den e pais aki. T’asinaki ta sigui bai sigui mèst e islanan aki?” e parlamentario di VVD a puntra.
Sekretario di Estado Ank Bijleveld sinembargo a desbaratá e ponensianan di Brinkman mesora.
Bijleveld a bisa enfátikamente ku e desishonnan tumá pa gobièrnu di Kòrsou ta keda tambe pa responsabilidat di gobièrnu di Kòrsou. Ulanda no tin nada di aber ku esei.
“Es mas: Ulanda a palabrá ku Antia ku e ta tuma e debe over te ku fin di 2005, nada mas. Kada partner den Reino tin su propio presupuesto. Antia ta bon na altura tambe ku e mester tin un presupuesto balansá den e añanan ku ta bini. E desishon ki maneho ta hiba ta keda un prerogativo di kada isla,” ta loke Bijleveld a kontestá Brinkman riba un tono masha trankil.
Ineke van Gent, miembro di GroenLinks den parlamentu ulandes klaramente tabata iritá pa e deklarashonnan di Brinkman.
“Loke Hero Brinkman a bisa no ta kuadra ku realidat. E kos aki a kuminsá iritá mi. Ta un hecho ku mester kombatí pobresa i desempleo riba e islanan. E oumento di sueldo mínimo i di ònderstant ta un oumento minimal kaba. Ami no tabata sa ku Brinkman ta kontra pa kombatí e problemanan aki. Mi ke pa sekretario di Estado pone tur kos riba un rei promé ku e siguiente konsulta ku nos lo bai tin, ya e tipo di ekspreshonnan aki ta for di mesa,” ta loke Van Gent a agregá finalmente.