WILLEMSTAD - Un delegashon di Federashon di Otrobanda, ku presidente Marusca Manuel na kabes, no ta dispuesto pa aseptá e desaroyonan ku ta tumando lugá ku áreanan den Otrobanda.
Ayera un grupo a presentá na paña di rou den tribuna públiko di Konseho Insular pa sigui e reunion públiko ku tabata tumando lugá. “Nos a bin deliberadamente asin’aki, pa demostrá nos preokupashon, pa mustra ku nos ke pa tene kuenta tambe ku pensamentu di organisashonnan di Otrobanda”, asina Marusca Manuel, presidente dje federashon a indiká. E grupo tabata bistí na blanku ku sinta pretu, pa asina indiká nan sintimentu. Federashon di Otrobanda a bati bèl basta dia kaba riba e intentonan pa desaroyá e área di Rif.
Manera ta konosí pa tur hende, tin vários grupo ku a demostrá interes pa haña e tereno pa konstruí proyekto riba dje. Gobièrnu di Kòrsou no a tuma un desishon ainda, pero tur kos ta indiká ku un òf posiblemente un kombinashon di e gruponan lo haña lus bèrdè pa kuminsá ku ehekushon di nan proyekto.
Anto aki e federashon tin un problema: Federashon Otrobanda ke weta un desaroyo kaminda e yu di Kòrsou ta haña tur posibilidat pa kuminsá ku su proyekto. Ademas, e federashon ta kere mas tantu den proyektonan mediano (i chikitu) i no ta kere ku mester duna un solo desaroyadó e tereno pa e ehekutá su plan. Pa Federashon Otrobanda, gobièrnu ta bendiendo e área ku gruponan djafó, “meskos ku el a bin ta bende henter Kòrsou último añanan”, segun Manuel. A para bira ku apénas nos por bai nos mes playanan, el a agregá. Manuel a bisa ku su federashon a presentá e plan aki na gobièrnu no ménos ku 7 biaha kaba den pasado.
“Aparentemente no tin oido pa nos plan, pasobra nos no ta wetando ku gobièrnu ta reakshonando riba nos pensamentunan”, el a bisa. “Nos presensia ayera den Konseho Insular ta pa weta si gobièrnu lo tene kuenta ku kriterionan di e Plan Mayó pa Otrobanda ku nos a formulá. E plan aki ta enserá un desaroyo ekonómiko partisipativo, kaminda pueblo por toka parti den dje. Nos ta papiando aki di un ekonomia balansá,” segun e presidente.
El a mustra, ku pa e federashon, e hòmber chikí tambe mester por benefisiá. “Federashon Otrobanda en todo kaso no ta kere den un proyekto grandi. Nos tin un hotèl kaba ku ta den fase final ku lo tin alrededor di 300 kamber. Nos ta keda kere den proyektonan ku ta trese un diversifikashon mas grandi pa nos ekonomia,” Marusca Manuel, presidente di Federashon di Otrobanda a afirmá.
“Lo mi buska un espasio den mi agènda ku ta hopi drùk kaba, pa mi sinta ku Federashon Otrobanda pa tende nan deseonan. Mi ke bisa for di awor si, ku miéntras ku nan ta papiando di proyektonan ku ami lo denominá komo “kleinschalig”, ami mes ta papiando di proyektonan ku mas bien ta “grootschalig”, ta loke diputado Anthony Godett a bisa ayera durante e reunion públiko.