WILLEMSTAD - Resientemente sra. Crisma Henriquez di Agencia Funeraria El Señorial a haña un invitashon di NFDA kual e ta 20 aña afiliá na e organisashon aki pa e ta presente na e konferensha i Expo ku ta hiba e nòmber di “NFDA Asia Funeral Expo & Conference” na Beijing China. Na e konferensha aki, sra. Crisma por a sera konosí ku e estilo di dera Asiátiko bishitando e.o. agensianan funeraria i santananan ku kada unu ta mes òf mas grandi ku Kòrsou kompleto. Loke el a siña ta, pa na momentu ku e personanan di e paisnan aki fayesé sea nan ta turista o esnan ku ta biba aki i nan deseo ta pa bai wòrdu transportá pa nan pais di orígen por hasi esaki na e forma korekto i na nan kustumbernan. Agensia Funeraria El Señorial ta konosí kaba, ku mandamentu di defuntunan pa Macau i Hong Kong, pero bishitando Beijing, Jentzen River, Shang Hai i vários otro pais mas, por a mira personalmente e sistema di bida i kustumbernan di e paisnan aki. Tabatin direktornan di Agensianan Funeraria di 43 pais i di Kòrsou ta sra. Crisma so a asistí. E trep di 17 dia aki tabata konsistí di hopi tour rònt Beijing. Sra. Crisma tambe a siña apresiá aun mas nos dushi Korsou, mirando ku na vários parti higiena tabata laga hopi di deseá. Macau ta wòrdu propagandá komo Asia su destinashon mas nobo i eksitante. Tur partisipante a risibí un sertifikado di partisipashon di NFDA pa nan partisipashon na e Konferensha i Expo aki. NFDA ta para pa: National Funeral Directors Association.
Tambe algun dia pasá, sra. Crisma a risibí e prestigioso “Pen” di CITRO (Citizens Rescue Organization) for di man di sr. Curd Everts komo gradisimentu ku sra. Crisma ta un persona dediká i masha spesial pa e organisashon. Sra Crisma ta koperá finansieramente tambe ku CITRO ya pa 15 aña konsekutivo. E dia di entrega di e “pen” aki, sra. Crisma i su Crew a perkurá pa un sukulento kuminda krioyo pa tur CITRO su miembronan i nan famia. CITRO ta konsiderá sra. Crisma komo un “Redder aan Wal”, i a opseki’é un plaka di mérito tambe riba e mesun dia ku el a risibí e pen. Kòrsou mester di mas persona asina aki pa sigui yuda CITRO ku ta traha ku personanan boluntario, riskando nan propio bida pa yuda i skapa bida di otronan. Sra. Crisma kier a bendishoná rikamente kada un di miembronan di CITRO ku ta hasi e trabou grandi i bunita aki.