WILLEMSTAD – E lesadónan di e korant di atardi Amigoe a haña un sorpresa ayera, na momentu ku a bira konosí ku Michael (Mike) Willemse a retirá for di Amigoe. Den último 11 añanan, Willemse tabata hefe di redakshon di e korant. Ayera tardi ainda Willemse no kier a bisa na radio kiko e ta bai hasi, pero ayera nochi el a partisipá ofisialmente ku e ta tuma e aktividatnan di ADCaribbean NV na su enkargo. E kompania ta produktor di e matutino Antilliaans Dagblad. Antilliaans Dagblad no a logra haña un posishon remarkabel den merkado di Kòrsou ainda, no opstante hopi esfuerso den último añanan. Bou di liderato di Willemse ku a gana atmirashon pa su trabou na Amigoe, e korant di mainta ta spera di por bira un protagonista di kalidat tur mainta. Willemse mes ta papia di un reto nobo. Den un komunikado distribuí ayera nochi, Willemse ta bisa, ku e kier duna ADCaribbean “un impulso kualitativo”.
“E korant por skor mas si e kontené mas notisia lokal i mas análisis di notisia. E anekso di wikènt – ADWikènt – ya kaba ta na bon kaminda. Mas opinion tambe ta nesesario: editorial, remitido di lesadó i kolumna. I tur esaki di un manera eksakto, imparsial i konfiabel. E kurason dje korant – ta mi opinion fuerte – por bati mas duru. E abonadonan i avisornan lo sigui di mes. Mi a siña na Amigoe ku kalidat ta paga su mes”, asina Willemse a bisa.
For di 1 di ougùstùs 1997 Willemse a kuminsá komo hefe di redakshon. Promé ku esei e tabata tres aña direktor/redaktor en hefe di Amigoe Aruba NV. Tur e añanan el a traha den estrecho koperashon ku èks direktor di Amigoe Ingrid de Maaijer-Hollander, ku a tum’é den servisio tantu na Aruba komo na Kòrsou. De Maaijer a retirá dia 1 di yanüari último. Willemse: “Nada malu tokante Amigoe; e ta den su añanan tòp. E korant ta pertenesé na e medionan di komunikashon mas lesá i poderoso di Antia i Aruba. Esaki, danki na bon hende i un redakshon briante, ku mi ta hopi orguyoso di a forma parti di esaki. Pero mi ke sigui. Mi ta den forsa di mi bida i mi tin e deseo pa hasi algu pa mi mes. Mi no a mira un futuro den un korant nobo. Ya kaba tin sufisiente korant, di kua dos ta na idioma ulandes. Amigoe no ta na benta i partisipashon di akshon no ta faktibel. Ademas, mi tata sabí semper a bisa mi, ku bo mester kita bai for di un fiesta na e momentu mas dushi.”
Ku e doño i editorial René Zwart di ADCaribbean el a logra yega na un akuerdo pa un mayoria di e akshonnan. Pa e finansiamentu Willemse a haña sosten i konfiansa di famia i amigunan. Zwart (54) lo keda ku un akshon minoritario i lo keda koresponsal pa e korant for di Ulanda. Antilliaans Dagblad ta keda un matutino skirbí na ulandes. “No un korant ulandes, pero unu lokal, den man di un persona lokal, skirbí na ulandes pa mas tantu periodista lokal posibel.” E atkisishon lo no tin konsekuensianan pa e personal. Lo kambia un ke otro si i lo pone otro aksènt riba sierto aspektonan. “ADCaribbean ta disponé di un aparato di distribushon bon i konfiabel. Por sierto e úniko korant entregá na kas mainta trempan, ku tambe ta kontené De Telegraaf. Esaki ta keda mantené”, asina Willemse a bisa.
ADCaribbean a keda fundá na sèptèmber 2003 i a sali for di Algemeen Dagblad Caribbean NV ku a kuminsá su aktividatnan na 1995 ku ayudo di Rotterdam. Sinku aña despues Zwart a kumpra e akshonnan di PCM Uitgevers i a kambia e korant di un broad sheet (papel grandi, manera Amigoe) pa un tabloid (ku ta e sais chikitu) i a kuminsá profilá su mes mas komo un medio lokal. Aña pasá ADCaribbean a logra un ganashi chikitu. “The time is right,” segun Willemse. “Aktualmente tin hopi konfiansa den nos isla. Ami mes ta sintié hopi fuerte. E diferente sektornan ta krese. Tin mas trabou i pa e motibu ei mas entrada kompará ku algun tempu pasá, no opstante e subidanan di preis. E relashonnan den Reino lo bira mas fuerte. Mi ta tende ta bisa: ‘Kòrsou tin posibilidatnan úniko’. Nos mester disfrutá di esaki.”
Willemse di 42 anja di edat tin un trayektoria amplio su tras. El a studia Politikologia i Siensia di Komunikashon na Universiteit van Amsterdam (UvA), unda el a spesialisá den organisashon i maneho di medionan di komunikashon (media-organisatie & -beleid). Na aña 1991 el a skirbi su tésis final tokante TeleCuraçao. Na aña 1986 el a optené su diploma propedeuse na HEAO (Hoger Economisch Administratief Onderwijs) na Zwolle, despues ku el a kaba su vwo na Radulphus na Kòrsou. El a kore stage na redakshon di NOS Journaal na Den Haag i el a traha komo freelancer na NOS na Hilversum den tempu di e promé Guera di Golfo. Despues ku el a kaba su doktoral el a bai traha na redakshon di Den Haag Vandaag na Binnenhof (unda Gobièrnu Ulandes ta situá). Pa Nova el a haña oportunidat di por traha reportahenan tokante di Kòrsou i isla Saba. Pa e revista ulandes Elsvier el a publiká entre otro tokante di Sürnam. Fo’i tempu ku e tabata studia na Ulanda, el a fungi komo koresponsal pa Amigoe i despues pa Beurs- en Nieuwsberichten.
Amigoe miéntras tantu a keda den man di e hefe interino Marius Noort. Di parti di Amigoe mes no tabata posibel haña un komentario riba e desishon di Willemse pa terminá su relashon di trabou ku e kompania den forma asina abrupto.