WILLEMSTAD – LA PRENSA a insistí den korte ayera, ku su informashon riba un kaso di kiebro ku a tuma lugá den flèt di Gerrit Schotte na yanüari último, tabata verídiko i a sirbi interes general. LA PRENSA a publiká dia 17 di aprel último ku ekspertonan a determiná ku den e kaso di ladronisia di un flèt di un prominente polítiko, eks gobernante, tabatin un kiebro. Despues a resultá ku e kiebro tabata esena (uitbraak). Nan konklushon a pone, ku FATUM a ninga di paga e claim ku e polítiko/eks gobernante aki a entregá.
Dia 22 di mei awor pa 9’or di mainta, wes mr. Drijkoningen lo dikta sentensia den e kaso ku Gerrit Schotte (miembro di Konseho Insular i kliente di un kompania di seguro lokal) a kuminsá kontra e korantnan LA PRENSA i BALA. Abogado di Schotte mr. Eric de Vries a pidi e dos korantnan pa rektifiká un publikashon ku el a konsiderá difamatorio pa su kliente. Ámbos korant a ninga di rektifiká e informashon ku nan a konsiderá ku ta basá riba hechonan verídiko. Despues di e rechaso, Schotte a instruí su abogado pa kuminsá e kaso ku a sirbi ayera tardi.
Pa loke ta trata LA PRENSA, nos Redaktor en Hefe a splika Wes, ku e publikashon a sirbi un kousa general pa atvertí komunidat pa aktitut di sierto representante/polítikonan. Un aktitut di iregularidat i aktua kon ku ta (sin konsekuensia) ku tin komunidat hopi kansá i fadá. Ounke ku e primisia di LA PRENSA di dia 17 di aprel no tabatin nòmber, Schotte a skohe pa hiba nos korant dilanti. Ta bin aserka, ku Schotte a demandá dos korant na papiamentu so, siendo ku un di tres korant (na ulandes) ku a publiká e mesun vershon si, e no a demandá. Esei ta indiká un aktitut arbitrario i un diskriminashon di medionan na papiamentu, asina LA PRENSA a alegá. Por sierto ku Schotte ni su abogado no por a duna un splikashon válido di kon a skohe pa e aserkamentu. Abogado De Vries a bisa, ku riba instrukshon di su kliente a skohe pa papia direktamente ku e korant en kuestion.
Mas aleu LA PRENSA a alegá, ku komunidat tin derechi di sa kiko su representante, skohé den elekshonnan, ta enbolbí den dje. “Imaginá ku polis mester bai buska un polítiko/gobernante mas i sak’é for di su kama pa violashon di lei? Hero Brinkman lo tene un fiesta na Tweede Kamer”, asina LA PRENSA a alegá.
LA PRENSA a insistí, ku su artíkulo tabata bon fundá i tabata un artíkulo periodístikamente responsabel. Den e kaso aki a papia ku e kompania mes, ku partido MAN i ku e investigadornan ku tur a konfirmá e kaso. LA PRENSA no a pidi komentario di Schotte komo ku no tabatin niun nòmber den e artíkulo. Ademas Schotte den último lunanan no ta atendé telefon mas di LA PRENSA. Ku esei tambe Schotte mes a skohe pa no kumpli ku e prinsipio di “hoor en wederhoor” ku ta un prinsipio importante den periodismo. Segun LA PRENSA, valides di e prinsipio aki ta bira nulo na momentu ku e otro banda a skohe (deliberadamente) pa no atendé ku sierto medionan. Schotte na momentu di a skohe pa no bin telefon pa LA PRENSA, a skohe tambe pa no skucha su opinion, asina LA PRENSA a argumentá.
Ademas a bin dilanti, ku den promé instansia LA PRENSA no a publiká niun nòmber. Ta despues ku otronan a hasi esei, LA PRENSA a konfirmá ku tabata trata di Schotte.
Pa loke ta trata BALA, direktor/redaktor Richard “Chati” Constancia a bisa, ku pueblo tin derechi di sa e bèrdat. El a rechasá e ponensianan di abogado De Vries ku e korant tabata ku eksesivo den e publikashonnan, loke a daña nòmber di su kliente. “Schotte tin nòmber, pero ku e tin honor si mi ta duda”, asina Constancia a bisa. El a pidi wes pa rechasá e demanda di Schotte. El a duna wes un splikashon amplio tambe kiko ke men un bohio, terminologia ku BALA a usa dia ku e korant a publiká detayenan di e kaso.
E abogado di Schotte a insistí den e kaso ku e publikashonnan a daña reputashon di su kliente. Ademas ta trata di un kaso privá entre su kliente i e kompania. “Hopi biaha sa tin diferensha entre kompanianan di seguro i nan klientenan i nan no ta alkansá publisidat. Di kon esaki si?”, asina e abogado a puntra.
Wes despues di a skucha e partidonan a pidi abogado De Vries pa suministrá korte e rapòrtnan riba e kaso. Despues di a konsultá ku su kliente, Schotte ku den promé instansia no tabata masha inkliná pa hasi esei, De Vries a bai di akuerdo. Wes a bisa ku no mester tin problema pa entregá e rapòrtnan aki, komo ku ya kaba Schotte a entregá un petishon na korte sivil pa haña pago di Fatum. Den un kaso asina tòg e rapòrtnan lo bin den publisidat, asina wes mr. Drijkoningen a bisa. Wes a determiná tambe ku kopia di e rapòrtnan mester bai pa e kontrapartidonan.
Wes a fiha djaweps otro siman pa 9’or di mainta komo momentu pa dikta sentensia den e kaso aki.