ORANJESTAD – Un comision di expertonan di Direccion di Aviacion di Aruba bou guia di sr. Louis Reed, hefe di seguridad di trafico aereo di Aruba, a prepara aña pasa cuater proyecto pa reemplasa varios equipo pa garantisa e servicio di trafico aereo. E ekiponan aki tin mas cu 13 aña den servicio continuo y mester di wordo reemplasa pa asina sigura e continuidad y calidad halto den servicio.
FLIGHT DATA PROCESSORS
E proyectonan ta encera compra y instalacion di “Flight Data Processors”, un sistema nobo di procesamento di data cu diferenbte informacion di vuelo cu ta yega of sali di Aruba. Tur informacion di un plan di vuelo, notanan of otro buletinnan aeronautico destina pa Aruba ta drenta via nos sistema di satellite for di e centro di distribucion (Nadin) na Atlanta y ta wordo procesa via e sistema nobo di FDP’s y manda pa Toren di Control, Oficina di Plan di Vuelo y informacion aeronautico, Apron Management Unit, y na edificio di departamento di Aviacion Civil.
VOICE COMMUNICATION SWITHING SYSTEM
Compra y instalacion di un Voice Communication Swithing System, un sistema nobo di comunicacion na unda e canalnan di e frequencianan, telefoon, interphone, direct access lines cu otro centronan di control di trafico aereo den Caribe y Miami por wordo ehecuta individualmente for di e shete diferente posicion di trabou den Toren di Control, y Apron Management Unit y na edificio di departamento di Aviacion di Civil.
E sistema ta uno hopi moderno na unda e operador ta usa un touch screen pa haci su seleccion di frequencia pa comunica cu avionnan y tambe cu otro usuarionan cual ta mucho mas facil y rapido, y sin interferencia. E sistema aki asina wordo yama Voice Communication Swithing System (VCSS), y mescos cu e sistema di Flight Data Processors nan ta dual system y tur tin nan propio sistema di “no break power supply”.
RADIO TRANSMITTER Y RECEIVERS
E proyecto aki ta e compra di nuebe radio transmisor y receptor incluyendo nan antenanan y filter. E radionan aki tin un potencia di 50watt y lo wordo usa dor di nan controladornan aereo pa comunica cu avionnan den nos espacio aereo. E radionan lo wordo instala dor di nan mesun tecniconan pa asina yuda reduci e costo total. Tambe nan ta remarca cu nos tecniconan y operadornan lo haya e trainingnan nacesario na Aruba y tambe den exterior.
VHF DIRECTION FINDER
Otro proyecto cu ta den fase di finalisacion ta e VHF Direction Finder cu pronto e contract pa su compra lo wordo firma. Esaki ta un aparato cu ta duna e controlador di trafico aereo indicacion for di unda of cual angulo un avion ta for di nos aeropuerto.
E proyecto aki ta wordo financia dor di gobierno di Aruba for di su propio presupuesto y lo mester wordo ehecuta den un periodo di seis luna. Como project manager ta fungi sr. Rafael Lacle, hefe di e Departamento Technico di Direccion di Aviacion Civil Aruba.