ORANJESTAD- Nacionnan Uni a proclama e fecha di 15 di mei como dia Internacional di Famia na 1993 y tur aña ta scoge un tema pa cua ta invita organisacionnan gubernamental y no-gubernamental pa dedica atencion na dje.
E tema pa e aña aki ta: “Tata y famia: responsabilidadnan y retonan”.
E desaroyo mundial cu nos conoce na unda ambos mayor ta traha ta exigi tambe cu ambos mayor lo mester ta prepara pa guia y educa e yiunan. Nos no conoce manera antes unda diferente miembro di famia ta yuda den cuido di yiunan, ya cu cada famia tin su propio responsabilidad. E abuelonan tambe hopi bes ta ocupa of no por yuda pa guia nos muchanan.
Den algun caso ta busca hendenan di exterior pa yuda den cas y nos conoce tambe casonan unda e ruman grandi tin cu wak pa e ruman mas chikito despues di scol.
Awendia ambos mayor tin e tarea pa comparti e cuido paternal y no laga tur responsabilidad cay solamente ariba e mama mientras cu e tata tey solamente pa e parti financiero. Despues di trabou tur dos tin cu yuda cu cuido di e yiunan y si acaso e tatanan no ta suficiente prepara pa comparti e tarea, anto comunidad lo mester yuda nan segun Nacionnan Uni.
Den pasado por a constata cu e felicidad den famia tabata hopi dependiente di e lasonan entre e mama y e yiunan pero pa mas o menos binti aña e interes di e rol di e tata ta aumentando no solamente pa e parti financiero pero tambe pa e desaroyo di e yiunan.
Na diferente pais ta pone atencion ariba e apoyo di e tata pa e mama durante y despues di embaraso, cuido di baby, educacion di yiu muher y comparti paternidad.
No por nenga cu nos conoce situacionnan unda e figura di e tata no ta presente pa diferente motibo. Den casonan di por ehempel divorcio, sa sosode cu e mama ta haya gran parti di e aydudo, tanto emocional como financiero siendo cu e tatanan tambe por bin na remarke pa un ayudo moral pa apesar cu nan no ta na cas mas, nan por sigui yuda den educacion di nan yiunan.
Investigadornan ta haciendo estudionan si ta existi un relacion entre e ausencia di un tata den famia y atendencia di scol y criminalidad, esta cu si pa motibo cu no tin un tata pa duna e apoyo moral y financiero, e muchanan no ta bai scol y ta cay den criminalidad.
E ausencia di un tata no solamente tin di haber cu por ehempel divorcio, pero mundialmente tin casonan di tatanan migrante, esta cu ta bandona nan pais pa bai traha pa gana un miho sueldo pa yuda nan famia cu ta keda atras.
Algo otro ta e tatanan di paisnan migrante cu tin cu yuda den educacion di nan yiunan den un pais cu un otro cultura. Por sosode cu e yiunan cu ta lanta den un otro sociedad, por rechasa e guia tradicional di e tata.
Un otro reto grandi pa tur hende ta den caso cu e tata ta e origen di violencia domestico y abuso sexual den famia causando dañonan fisico y emocional na su esposa y yiunan.
E maneho social di un pais tin un rol importante den situacionnan asina pa medio di educacion di e miembronan di famia, maestronan y otronan den e campo social. Nacionannan Uni ta boga pa suministra proteccion fisico y legal na miembronan di famia cu ta bira victima di violencia domestico y abuso sexual. Tambe e persona cu ta comete e delitonan aki mester di ayudo ariba tur tereno necesario.
Segun señor Eric Olson, di e oficina di Focal Point on the Family di Nacionnan Uni, e tata tin un rol importante y constructivo den e famia y pesey mes tambe lo mester crea un ambiente positivo pa stimula esaki tanto na cas como den henter un comunidad.
E maneho social lo mester por crea posibilidadnan pa asisti e tatanan pa enfrenta e retonan, manera programan educativo pa e tatanan, mas envolvimiento den e cuido di e baby recien naci, orario flexibel di trabou, mas tempo pa wak pa yiu (compara cu e zwangerschapverlof pa mama).
Cu otro palabra mester crea mas oportunidad pa e tatanan por ta mas motiva pa carga e responsabilidadnan cu nan tarea como tata ta exigi di nan.