WILLEMSTAD – Den apénas 3 siman polis a tira dos pashènt sikiátriko agresivo ku a zuai ku kuchú den nan direkshon. Dia 23 di aprel polis a tira e hòmber J.Z. (35) riba Traiweg na Boca Sami i ayera polis a tira e hòmber L.S. (28) na Clioweg. A tira e pashèntnan sikiátriko pa motibu ku polis no por a dominá nan na un otro manera.
Dia 23 di aprel polis mester a bai Boca Sami kaminda riba kaya tabatin un hòmber agresivo ku mester a bai ku Klínika Capriles ku CEMS. Na e sitio tabatin polis ku mester a asistí e personal di CEMS pa transportá e pashènt sikiátriko agresivo. Dado momentu e pashènt a kuminsá tira e polisnan ku tayó i tambe menasá nan ku un palu di basora i un kuchú. E polisnan sin embargo no a logra desarmá e pashènt agresivo i a disidí na tira dirigí riba dje. Un bala a alkans’é na su las. Ayera atrobe polis a tira un pashènt sikiátriko agresivo. E suseso a tuma lugá na Clioweg den kareda di 13.43. E pashènt sikiátriko tabata menasá su bisiñanan ku un kuchú i ora polis a yega el a menasá nan tambe ku e kuchú. Despues ku na vários okashon e polisnan a dun’é òrdu pa pone e kuchú abou, un di e polisnan a lòs un tiru dirigí riba dje. E bala a alkans’é na e parti abou di su pia drechi.
LA PRENSA a kombersá awe ku e direktor di Skuchami, Norman Cicilia, ku a mustra riba e urgensia pa bin ku un tim di krísis mobil. “E tim akí lo ta alkansabel 24 ora pa dia i lo konsistí di polisnan èkstra ordinario ku no ta armá i nan lo ta kompañá pa un sikiater sosial. E polisnan ta di trein pa papia ku un pashènt sikiátriko agresivo te ora domin’é. P’esei mes nan no mester di arma di kandela, pasó nan ta di trein pa papia ku e pashènt i domin’é. Mi tin ku bisa ku no ta tur hende por atendé ku un hende armá ku un kuchú. Un hende armá ku un arma di kandela ta un otro situashon, pero un hende armá ku un kuchú, ta duna espasio pa papia kuné i kita e kuchú.”
Cicilia a bisa bon kla, ku e no por duna niun komentario riba e motibu ku e polisnan a tira e pashèntnan, pasó e no sa ta bou di ki kondishon e susesonan a tuma lugá. Loke si el a bisa ta, ku e no ta kere ku e kos mester bira un patronchi, kaminda ora polis tin ku desarmá un pashènt sikiátriko, e tin ku tir’é. “For di yüli aña pasá mi ta direktor na Skuchami, i fo’i dia mi a yega akí mi a topa un situashon kaminda niun hende no kier a karga e responsabilidat pa transportashon di pashèntnan sikiátriko. Ta p’esei mes mi a aseptá pa skuchami trèk e proyekto di e tim di krísis mobil, ku mester atendé den futuro ku pashèntnan sikiátriko agresivo. Nos no mester lubidá ku akí ta trata di hende malu ku mester di kuido spesialisá. Ta bin aserka, ku nos no mester pèrdè for di bista, ku ta trata tambe di hendenan ku ta miembro di e komunidat akí. Nan tambe tin derechi riba un trato humano meskos ku kualke otro siudadano respetá lo a haña. Nan por ta drogadikto òf chòler, pero nan ta hende tambe.”
Anteriormente tambe tabatin kasonan kaminda pashèntnan sikiátriko a muri den outo di polis, den ambulans i na kas, pa motibu ku niun instansia no a haña ku ta nan ta responsabel pa skapa e pashèntnan nan bida. Dia 4 di mei Gershwin La Croes a muri den un outo di polis dilanti di warda di polis na Punda. Despues ku polis a detené pa motibu ku el a menasá hende, nan a bui e i hib’é Punda pa for di einan wak kiko mester hasi kuné. Promé ku por a logra dun’é asistensia médiko el a muri.
Dia 24 di mei Orlando Amerikaan a muri den un outo di polis dilanti di warda di polis na Rio Canario. Polis a detené Amerikaan riba kaya despues ku e tabata stroba òrdu públiko. Ora nan tabata bayendo warda di polis kuné el a logra sali for di e outo di polis i drenta un pakus kaminda el a destruí diferente kos. Polis a bui e i hiba warda di polis na Rio Canario kaminda nan a lag’é di bui den e outo. Ora e polisnan a bin busk’é, a resultá ku el a muri.
Dia 4 di ougùstùs 2007 Sovyendy Kopra a muri den un ambulans dilanti di warda di polis na Punda, despues ku a kore kuné den ambulans di bui i mará riba un brankar mas ku tres ora. Despues ku polis a detené den Dein, a trata na regla ayudo serka diferente instansia. Ni Klínika Capriles ni Hòspital no kier a intern’é pa kuido. Finalmente a bai kuné warda di polis ku intenshon pa ser’é den un sèl, miéntras ku su situashon tabata sumamente krítiko i e tabata muriendo. Pará dilanti warda di polis ta diskutí kiko mester hasi kuné, el a muri den e ambulans.
Dia 5 di mart último Lidio la Crus a muri na su kas den Cartagenastraat, despues ku parti di mainta e tabata agresivo i a kibra kos den kas. Ora a yama su dòkter di kas esaki a bisa ku e no por bin. No ta konosí dikon polis no a kompañá CEMS pa transportá e pashènt pa Klínika Capriles òf Hòspital. Remarkabel ta ku e suseso a tumá lugá riba un distansia hopi kòrtiku for di poli.
Tur e kasonan akí a pone ku aktualmente ta trahando riba un inisiativa pa yega na un tim di krísis ku mester yuda pashèntnan sikiátriko agresivo, na momentu ku nan haña nan mes den problema. Resientemente tabatin un enkuentro ku entre otro Polis, Ministerio Públiko, CEMS, Hòspital, Klínika Capriles, Skuchami, Inspekshon pa Salú i Asosashon di Dòkternan di Kas.