Skina di Sorti, awe djaweps 15 di mei di 2008, ta kuminsá ku deseá tur hende un bon dia. Na di promé lugá mi ke manda e siguiente mensahe pa señor diputado Anthony Godett, despues di su tirada den Konseho Insular. Skina di Sorti, ni ningun otro kolumna ni medio no ta partisipá na elekshon. Nan no tin voto pa gana ni pèrdè. Lokual si nan tin ta influensia grandi riba e persepshon di kualke polítiko serka elektorado. Guera kontra di kualke medio pa definishon ta un akshon polítikamente bobo.
****
Un kapitalista, òf grupo spesífiko den komunidat tampoko tin voto pa gana òf pèrdè. Lokual nan tambe tin ta na su debido tempu influensia riba e forsa ku kual un polítiko òf partido polítiko por partisipá na un proseso elektoral. Nan ta sirbi komo sea finansiadó, kampañadó, aktivista òf forsa kreativo ku ta indespensabel den un proseso elektoral. Guera kontra di nan tambe pa definishon ta un akshon polítikamente bobo.
****
Elektorado no ta disidí riba kende nan ta bai vota a base di tirada di un diputado kontra di prensa, persona, kapitalista òf sindikalista. Nan ta vota a base di e resultado konkreto ku nan ta sinti di maneho ku e diputado ta hiba i òf e manera ku e diputado ta kumpli ku e persepshon ku e diputado a krea serka nan ora e tabata kampañá. Resultado elektoral pasá ta bisa sin lugá pa duda, ku e diputado no a kumpli.
****
Pasobra MAN a eliminá su mes komo un partner di koalishon pa PAR i PNP, i PAR no tabata dispuesto pa drenta un aventura ku diferente partido chikitu, FOL i su lider polítiko Anthony Godett a haña un “second chance”. E lider polítiko di FOL, personalmente tabata tin kosnan di drecha den bista di komunidat en general i su votadornan en partikular. Proseder di e diputado sinembargo no a reflehá ningun intenshon di drecha lokual komunidat i su votadornan a konsiderá komo violashon di konfiansa.
****
Diputado den e koalishon nobo ta malusá su posishon komo miembro di Konseho Insular i diputado (foronan ku e ta haña disposishon di dje pa papia riba asuntu di gobernashon) pa agredí ken sea ku kuestioná su maneho i proseder komo representante di pueblo. Aparentemente e no ta komprondé ainda ku su huramentashon ta oblig’é di defendé i respetá derecho fundamental di tur suidadano i di duna kuenta i rason. E no tin di sapatia i konvertí sala di Konseho Insular den un teatro, pero mester responsabilisá su mes. Punto!!!!!!
****
Despues ku Korte den mas ku un instansia a dikta ku ela faya den su promé inkurshonnan ku su huramentashon den su “second chance” e diputado ta kuminsá ku hinka su mes den proseso gubernamental ku Wes ta bolbe rechasá. Na e okashon ei den Skina di Sorti a atvertí señor diputado ku e ta hinka su mes den situashon di “minachting van de rechtsgang”.
****
Den Skina di Sorti a sigui vários atvertensia mas kontra di un aparente kultura di gobernashon ku ta den konflikto ku reglanan di bon gobernashon. Den Skina di Sorti a atvertí partnernan di koalishon ku nan tambe ta responsabel pa e direkshon robes ku maneho di Bestuurscollege ta kue. Na momentu ku e proseder rondó di un invershonista serio a pasa tur límite di bon gobernashon, den Skina di Sorti mi a pone bon kla ku e ora a yega pa hasi denunsia.
****
Pa lokual ta e aspekto personal t’asina ku kualke hende ku ta wak un poko mas leu ku su nanishi por lesa na final di e kolumna ta kiko e ophetivo dje kolumna ta i ta dikon e aserkamentu ta manera e ta. Mi ta mantené mi mes na e disiplina dje trabou i lo no usa e kolumna pa un reakshon personal. Pero esnan ku konosé mi mester sa ku nunka mi a bèk pa ningun pelea i ku mi trayektoria ta kontené yen di enkontronaso riba tur sorto di foro polítiko.
****
Pues sépalo ku si ta guera riba nivel personal señor diputado ta buska e kontesta ta “if it’s hell you want, you are knocking at the right door”. Ami tin entrada tur kaminda pa e persona ku mi ta. Konosementu i kapasidat i no un posishon temporal ku ta dependé di grasia di elektorado òf fabor di ningun hende. Mi no por gana den papiamentu di ko’i loko ni otro akto di kanibalismo moderno. Pero riba kualke tema mi no ta baha kabes pa ningun hende. Un kos si, semper bai mi ta bon dokumentá pa supstansia tur mi ponensianan.
****
Pa lokual ta Skina di Sorti i e papel ku e tin mi ta bolbe referí na e trabou di prensa:”A free press informs the public, holds leaders accountable, and provides a forum for debate of local and national issues. Democracies foster the existence of a free press. An independent judiciary, civil society with rule of law, and free speech all support a free press. A free press must have legal protections”. Ku representante di pueblo en bes di defendé e derecho di suidadano i e posishon di “free press” ta bisa mas di dje ku e ta bisa di prensa.
****
Pa lokual ta e kaso spesífiko ku nos ta insistí mester kuestioná lo siguiente: ”In democracies the government is accountable for its actions. Citizens therefore expect to be informed about decisions their governments make on their behalf. The press facilitates this "right to know," by serving as a watchdog over the government, helping citizens to hold government accountable, and questioning its policies”. Ta esei nos ta hasi sin rel ni trel. Sin tembla i sin miedu.
****
“Democratic governments grant journalists access to public meetings and public documents. They do not place prior restraints on what journalists may say or print.
The press, itself, must act responsibly. Through professional associations, independent press councils, and "ombudsmen," in-house critics who hear public complaints, the press responds to complaints of its own excesses and remains internally accountable”.
****
“Democracy requires the public to make choices and decisions. In order for the public to trust the press, journalists must provide factual reporting based on credible sources and information. Plagiarism and false reporting are counterproductive to a free press. Press outlets should establish their own editorial boards, independent of government control, in order to separate information gathering and dissemination from editorial processes”.
****
Nos ta duna kuenta i rason na gerensia i hefe di redakshon. Nos no tin ningun sorto di kuenta di duna na señor diputado ni ningun otro polítiko òf organisashon polítiko. “Journalists should not be swayed by public opinion, only by the pursuit of truth, as close as they can get to it. A democracy allows the press to go about its business of collecting and reporting the news without fear or favor from the government”.
****
Pa lokual ta sushamentu di nòmber, mi kier sa ta kual ta e kriterio ku señor diputado ta usa. Hanchu pe, smal pa otro? Ta kual kriterio el a usa ku a pone ku Wes a kondená na paga èks promé minister mr. Miguel Pourier pa daño na su bon nòmber? Ta personanan ku mal influensia e mester kuri kuné pa evitá ku su “record” no ta bolbe haña mancha riba dje.
****
Pa lokual ta intento di intimidashon mi ke rekord’é, ku un otro diputado a sinti su mes yamá pa agredími verbal den públiko i mi kontesta na dje dilanti di tur hende tabata “you made my day” pasobra mi ta alimentá mi mes ku menasa. Awe e persona en kestion ta dualu den mundu komo un paria. Pues, señor diputado hasi lokual e ta sinti ku e tin di hasi i nos ta hasi di nos.
****
Pa mi e kos no ta manera e piesa di Doble RR ku ta bisa ku ta “wega di amigu”. Pa mi e kos ta “damn the torpedo’s, full speed ahead captain”!
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.