Dia 13 di yüni tur studiante mester tin nan resultado

WILLEMSTAD – Miéntras ku pruebanan kombiná a kuminsá for di e siman aki na skolnan básiko, awor tur kos ta kla pa e hóbennan den klasnan di eksamen di VSBO, HAVO i VWO kuminsá ku e pruebanan importante aki.
E promé dia di e eksamennan lo ta djabièrnè 16 di mei pa VWO i riba djaluna 19 di mei pa HAVO i VSBO. Un total di 3444 kandidatonan lo bai pasa nan eksamen den henter Antia. E periodo di durashon lo ta di kasi dos siman i lo disidí si nan lo tèrminá skol avansá ku éksito. Hopi di nan lo sigui ku nan estudio mas avansá e ora ei.
E gran mayoria di studiantenan ku ta bai pasa eksamen ta bin di VSBO. Esaki ta pa di kuater aña ku ta pasa eksamen final na VSBO.
Un total di 2493 studiante lo pasa eksamen di VSBO na Antia na 19 skol. Aña pasá e sifra aki tabata 2535.
Pa loke ta HAVO, un total di 723 studiante lo pasa eksamen awor aki kompará ku 659 na 2007 i VWO e sifra ta 228 na 2008 kompará ku 260 na 2007. E kantidat di skolnan ku nan studiantenan ta pasa eksamen ta 8.
Manera a indiká kaba, VWO lo ranka sali promé ku eksamen mañan ku e vak Ulandes. VSBO i HAVO ta kuminsá djaluna ku e mesun vak.
E periodo di eksamen lo keda será riba djabièrnè 30 di mei. E último eksamennan pa HAVO i VWO lo ta pa e vaknan di Spañó i Informátika.
E di dos periodo òf mihó konosí komo ‘hereksamen’ ta kuminsá e ora ei pa VSBO riba djaluna 16 di yüni i pa VWO i HAVO riba djamars 17 di yüni.
Resultadonan di e promé periodo di eksamen lo wòrdu poné na disposishon di e skolnan di VSBO pa mas tardá 12 di yüni i pa HAVO i VSBO dia 13 di yüni. E skolnan e ora ei mester partisipá esaki pa mas tardá 13 di yüni na e studiantenan ku a pasa eksamen. E resultadonan di e di dos periodo lo bira konosí riba djaweps 26 di yüni.
Pa loke ta e repartishon di e kantidat di studiantenan ku ta pasa eksamen aki na Kòrsou ta lo siguiente, pa VSBO esaki ta 1889 studiante na 13 skol.
Un total di 637 studiante di HAVO lo pasa eksamen aki na Kòrsou i 209 pa VWO na seis diferente skol.