Mr. Lorito (SLURP) ta yama tur hende un felis dia. Un saludo pa Don Remco ku ta pendiente di su Lorito tur dia. Tambe un saludo pa Doña Gladys ku no por sin su Lorito.
*********
Den e dianan aki nos ta na kareda djaki pa aya pa atendé diferente kos ku tin di aber ku nos trabou, pero ku sigur tin su impakto tambe riba nos produkshon. Lorito a disidí, ku e no ta laga nada stroba i ta sigui dal bai. No mas ku e pik di Lorito a lanta masha doló awe. Nos a purba ku stropi, awa ku salu i finalmente nos amigu Toni a bisa nos simplemente, dal un apel. Riba esei nos ta awor aki!
*********
Awe diputado Nini lo bai Aruba pa diferente aktividat, inkluyendo un di CAYCO i un kombersashon ku e hendenan di Meta Corp. Awe mainta nos a tuma nota di un artíkulo devastador ku a sali den e korant Diario na Aruba riba Grupo Cayco. Nos a papia ku produktor di e korant i el a bisa nos, ku e kos aki no ta masha bunita. Loke ta straña nos ta, ku e artíkulo (ku a sali for di dia 9 di mei último) no a haña ningun reakshon, ni di Cayco ni di otronan nòmber menshoná. Lorito di, laga nos keda leu for di esaki, pasobra ya kaba nos tin ku atendé ku kèts Nike den lodo!
*********
Un otro artíkulo ku a kapta nos atenshon ta, kon ta relatá ku un komersiante libanes ku ta papia ulandes i papiamentu i ku ta biba na Kòrsou, tin ròl grandi den loke ta pasando aktualmente na Libanon. E korant ulandes Twentsche Courant Tubantia ku Safi El Mir ta biba na Kòrsou, tin nashonalidat ulandes i ta papia arabir, ulandes i papiamentu. E tin 18 aña biba na Kòrsou ku 5 kompania aki. Ademas e tin un kompania na Jordaan na Amsterdam.
*********
Asina bo ta mira ku nos ta masha internashonal. Bo ta kòrda ku LA PRENSA a informá, ku nan a kue un trafikante di arma global despues di un trampa ku nan a traha pa e i su kompañero na Kòrsou. Bo por kere ku ta e siman aki numa De Telegraaf tabatin e storia aki? Un notisia di LA PRENSA di algun siman pasá. Ta djis pa ilustrá kon bon nos ta!
*********
Nos ta pendiente pa wak kiko shofùrnan di bùs lo bai hasi den e próksimo oranan. Tin masha konhetura i niun hende no sa kiko ta kiko. Naturalmente tin ekstremistanan ku ta trata di hinka spantu den pueblo, komo si fuera ta nan kos! Shofùrnan di bùs a bisa bon kla kaba, ku e kos aki no ta un lucha polítiko i nan no kier infiltrashon polítiko!
*********
Aki na Kòrsou hopi hende pendiente pa e elekshonnan na Santo Domingo mañan. Nos a mira yen di hende ta kampañá, inkluyendo un pader konosí, pa Leonel Fernandez. Parse ku Monseñor no a gusta e kos ei masha. El a kaba di sali for di e problemanan di pastor Rudi i awor ata otro problema.

(foto Lorito)
*********
Aki na Kòrsou mas o ménos 1200 dominikano tin derechi di voto mañan na Steenrijk. Na Ulanda tambe tabatin masha aktividat i nos a tuma nota ku Juan Nepomuceno tambe tabata presente pa duna sosten na su kandidato. Juan ta defendé su Leonel tur ku tin!
*********
Aki na Kòrsou nos tin ku warda ainda riba e próksimo elekshon. Hesus nos tin gana pa elekshon ta serka pa Lorito pidi pueblo pa kore ku algun hende, entre nan esnan ku por yega den un pakus i kumpra un oloshi di 5 mil dollar kèsh! Te mañan ku Dios su poder!