WILLEMSTAD – E korant mas grandi di Aruba Diario, a atvertí Aruba i Kòrsou pa aktividatnan di grupo Cayco. Awe mainta direktor/hefe di redakshon di e korant Jossy Mansur a konfirmá pa LA PRENSA na Kòrsou, ku den un edishon di e korant di nos isla bisiña, a sali un artíkulo amplio ku no ta masha bunita pa e grupo italo/argentino. Mansur a duna LA PRENSA lus bèrdè pa publiká partinan di e artíkulo siempre en kuando nos referí ku aki ta trata di un artíkulo di e korant rubiano. Remarkabel ta, ku e artíkulo a sali for di dia 9 di mei i te awe no tabatin un reakshon riba e ponensianan skèrpi ku tin den e artíkulo.
Den un artíkulo, amplio por sierto, e korant ta hasi menshon di e diskushonnan ku tabatin na Kòrsou relashoná ku desaroyo di e área di Rif. E korant ta bisa, ku e diskushonnan por poko a tumba gobièrnu di Kòrsou.
E korant ta bisa, ku diputadonan di Obranan Públiko di Kòrsou, ku ta íntimo amigu di un eks polítiko hóben arubiano, ta kontra e plannan di Meta Group i lo ta favoresé un grupo venezolano. Ta e mesun eks polítiko arubiano ku tabata promotor di e proyekto Namdar/Caribbean Cruise Line a hiba e grupo Kòrsou. E korant ta hasi menshon, ku e grupo Cayco (Gammos y Construcciones S.A.) tin su ofisinanan na Merida i Caracas. E doñonan ta originalmente desendientenan italo/argentino i nan kliente mas grandi ta PDVSA, asina e korant ta bisa. Den su investigashon, e korant ta splika, ku el a haña sa tambe ku abogado i konsehero di e grupo ta omo (tio) di e eks polítiko arubiano ku e korant ta identifiká komo Mo Diek. Tambe e korant ta bisa, ku el a haña informashon ku un eks kordinadó di e minister di Infrastruktura di Aruba tin un kontrakt di konsultant ku e grupo venezolano. E korant ta sigui bisa, ku el a kai riba diferente aspekto den e kaso aki di iregularidatnan ku tereno na Aruba, riba kua LA PRENSA lo bin bèk. Diario ta bisa, ku ta bon pa Gobièrnu di Aruba vigilá e grupo aki di serka,pa evitá ku nan ta komprometé esnan debil den komunidat di Aruba. Mester hasi meskos ku na Kòrsou, kaminda partnernan di koalishon a logra konvensé e diputado di Obranan Públiko di no drenta siegamente den e aventura ku e grupo venezolano. Diputado Anthony Godett a bisa e siman aki, ku e lo trata di pone e dos interesadonan pa e área di Rif huntu na mesa. Den e kuadro aki e diputado lo hasi un bishita awe i mañan na Aruba kaminda e lo papia tambe ku representantenan di Meta Group komo Cayco.
Remarkabel ta, ku no opstante e ponensianan fuerte di e korant di Aruba, no tabatin ningun reakshon di e grupo mes riba e publikashon. Mansur a bisa LA PRENSA, ku e kaso aki ta un “rotzooi”. Mas detaye e no kier a duna i a bisa ku nos tin tur outorisashon pa reprodusí e artíkulo, bisando ku ta den Diario e artíkulo a sali.