WILLEMSTAD/DEN HAAG – Un montante di 4,5 mion euro ta envolví den limpiesa di asbèst riba e barku Otapan den haf di Rotterdam. For di 1999 e barku a drenta e haf ku un kantidat di 76.850 kilo di asbèst. Aña pasá a deklará e barku limpi i awe el a sali haf di Rotterdam rumbo pa Turkia, kaminda lo desmantel’é.
Na aña 1999 Otapan a drenta haf di Rotterdam i a keda te 2006. Despues e barku a sali pa Turkia pa sania. Sin embargo outoridatnan Turko a nenga di laga e barku drenta pasó tabatin muchu asbèst na bordo. Den e dokumentonan tabatin menshon di 1000 kilo, pero en realidat tabatin kasi 77 tonelada. E kapitan mester a bira bèk i bai Ulanda, kaminda aña pasá a sania e barku. A keda 850 kilo di asbèst riba e barku ku por deshasí di dje solamente ora desmantelá e barku. For di aña pasá òktober a saka e barku for di haf di Rotterdam i a mar’é na ‘s Gravendeel. For di einan lo tou e barku di 170 meter largu via Oude Maas i Nieuwe Waterweg. Djei nan, via un trayekto di tres siman, e mester yega Turkia kaminda lo desmantel’é i kita e sobrá asbèst.
Pa a sali for di e impase ku a dura for di 1999, e ministerio di Volkhuisvesting, Ruimtelijke Ordening en Milieubeheer (VROM), a sòru pa limpia e barku. Ulanda i e doño di e barku, e wèrf Turko Simsekler, a yega na un palabrashon tokante repartishon di e gastunan pa e barku a mara i keda den e haf di Rotterdam, gastunan di seguro, vigilansia i di tou. Ta trata di un montante di 240 mil euro ku Simsekler a paga di e total di 550 mil euro. Te ainda tin un kaso hudisial kanando, kaminda ta trata na kobra e doño anterior Mehikano di e barku, e montante di 4,5 mion euro.
E organisashon di medio ambiente Greenpeace, ta kontentu ku a sania e barku i ku Turkia a aseptá e barku. Esaki ta un bon ehèmpel pa tur e sentenar di barku ku ainda mester limpia. Tur pais Oropeo mester hasi meskos, Greenpeace a deklará. Tur pais mester tuma medida i no skùif e problema riba otronan. Ku e kaso akí por mira ku por. E ta kosta algu, pero pa esaki mester regla e responsabilidat mas mihó, segun Greenpeace.

Freewinds

Akí na Kòrsou e insidente di asbèst riba e barku Freewinds tambe ta solushoná. Entretantu e barku a haña un ‘clear’ pa e por bandoná haf di Kòrsou. A eliminá e asbèst ku tabatin riba e barku i kontaminashon ku a surgi ora e asbèst a kibra, ta limpiá. No ta konosí ainda ta kuantu kilo di asbèst a kita for di e barku, ni tampoko kiko a hasi kuné. Resientemente e direktor di Selikor, Wesley Kook a deklará, ku tin posibilidat ku e asbèst ta derá na Malpais. Kook a bisa, ku niun hende no a mèldu na Selikor ku nan tin asbèst pa deshasí di dje. Pero mirando ku tin papiá ku a deshasí di e asbèst di Freewinds, tin chèns ku ta na Malpais a deshasí di dje ounke no por prueba esaki.
Sin embargo despues ku LA PRENSA a kombersá ku Kook, tabatin informashon ku niun asbèst no a baha for di e barku. LA PRENSA lo sigui investigá e kaso di asbèst akí pa konfirmá unda e asbèst ta depositá.