WILLEMSTAD – “Na ougùstùs awor Gobièrnu Sentral ta spera, ku e tin tur kos detayadamente reglá ku por kuminsá ehersé kòntròl den kuadro di e lei pa enseñansa obligatorio. Ta ku e meta aki a apuntá resientemente Richenel Look komo e inspektor enkargá ku kòntròl riba e tereno aki”, minister di Enseñansa Omayra Leeflang a anunsiá.
Na ougùstùs di aña 2007, a aprobá e lei aktual di enseñansa obligatorio.
For di e momentu ei gobièrnu a bin ta hasi e trámitenan nesesario pa garantisá ku e lei ta un lei tambe ku ta funshoná den práktika.
“E lei”, segun minister Leeflang, “ta stipulá a base di artíkulonan spesífiko, kon mester atendé ku sierto problemanan riba tereno di enseñansa.
E mandatario a splika, ku resientemente Gobièrnu Sentral a bai di akuerdo pa nombra inspektor di polis Richenel Look komo e persona enkargá ku kòntròl hudisial riba e lei di enseñansa obligatorio.
Richenel Look no ta un deskonosí: durante hopi aña largu, el a fungi komo parlamentario pa frakshon di Frente Obrero den Staten di Antia i ta un persona ku e konosementu nesesario riba tereno hudisial.
Look lo tin e tarea pa atendé ku e fenómeno di muchanan ku ta keda sin bai skol sin un motibu bálido.
“Ku otro palabra, banda di e man sosial edukativo ku nos tin den persona di un funshonario na Servisio pa Asuntunan di Enseñansa (SAE), nos tin tambe awor e brasa hudisial pa atendé ku man duru ku esnan ku no ta kumpli ku e lei,” di akuerdo ku minister Leeflang.
E kòntròl ei lo kuminsá na luna di ougùstùs awor, esta entrante e aña eskolar nobo.
“Den e lei”, segun e minister, “a pone artíkulonan spesífiko kon e parti hudisial mester atendé ku e situashon aki.
Artíkulo 6a ta bisa ku minister di Hustisia ta duna Imigrashon outoridat pa kontrolá pa hóbennan no bandoná pais sin outorisashon di e outoridatnan kompetente.
Artíkulo 6b ta bisa, ku ámtenarnan apuntá pa e tarea polisial, ta sòru pa hóbennan ku bou di ora di skol ta den lugánan públiko, por ser atendé pa e funshonario polisial.
Banda di esaki, tin e tareanan general, esta kaminda polis por hasi tarea di investigashon general. For di 12 aña, e hóben mes tambe ta responsabel pa kumpli ku lei”, di akuerdo ku e minister.
“Ku otro palabra”, asina e la bisa, “tin sufisiente garantia pa aktua ku man duru. Esaki ta hopi importante, pasobra nos ke proba di e forma aki ku e hóben ta importante pa nos.
Nos tin inovashon, nos ta hasiendo invershon, nos ta trahando duru pa drecha nos enseñansa i pa nos no por ta posibel ku ketu bai nos tin un kantidat di mucha ku ta kai afó,” Leeflang a bisa.
Por sierto ku lo instituí un liña di telefon, kaminda por yama direktamente pa komuniká ku e ofisina di inspektor pa pone esaki na altura di muchanan ku no ta bai skol”, e mandatario a anunsiá.
Richenel Look mes a splika ayera, ku for di momentu ku el a haña e enkargo ei, el a kuminsá move mesora. Mi no a bai sinta warda te dia mi haña telefon, outo pa kore aden i otro kosnan ku ta nesesario pa mi trabou, asina el a bisa.
Look a informá, ku el a tuma kontakto entretantu ku diferente instansia, entre kua Ministerio Públiko pa pone establesé e forma ku e ta bai funshoná den futuro.