WILLEMSTAD – “Gobièrnu Sentral ke yega na un solo maneho di adikshon aki na Antia. Awor aki esei ta diferente riba kada isla di Antia. Ku e meta aki, gobièrnu ke organisá un konferensha pa asina pone tur nanishi den mesun direkshon”, asina sekretario di Estado enkargá ku salú públiko, bou di kua maneho di adikshon ta kai Joan Smart-Berkel, a anunsiá ayera.
“E problema di adikshon ta un kos serio den nos pais”, asina e mandatario a mustra. Awor aki tin komo 150 adikto na droga ku mester haña tratamentu.
Brasami, e sentro ofisial di gobièrnu ku ta dediká su mes na tratamentu di esnan ku ta adikto na droga, no por akapará e personanan aki. Manera ta ampliamente konosí, no tin espasio – ni tampoko e medionan finansiero – disponibel pa por atendé ku nan tur.
E sentro Brasami aki na Kòrsou a enfrentá problema finansiero durante un periodo prolongá algun tempu pasá. Tur fin di luna tabatin difikultat pa paga e empleadonan. No ta masha konosí si a yega na un solushon struktural pa e problema aki. Joan Smart-Berkel a bisa ku el a logra establesé un departamentu pa hende muhé den Brasami pa atendé ku drogadikto. Pero mi no ke sigui ekspandé esei sin mas, pero ke hink’é den kuadro di un pida maneho, el a bisa. E mandatario di tur manera ke atendé e tipo di kosnan aki den un pakete.
“Mi a nota ku riba kada isla sinembargo, ta hasiendo esfuerso pa yuda e hendenan aki. Pero kada isla tin su mes manera di mira i hasi kos i te ainda no tin un uniformidat den esaki”, Joan Smart-Berkel a indiká.
El a mustra ku gobièrnu ke yega na un maneho ku ta mas uniforme posibel.
“Anto den e kuadro ei mi ke atendé ku maneho di adikshon. Ta den e kuadro ei mi ke atendé ku e situashon finansiero, ku e tipo di tratamentu ku e drogadikto mester haña, ku tur aspekto di maneho di adikshon,” el a bisa.
“P’esei lo tin na kuminsamentu di yüni awor un konferensha den kua Gobièrnu Sentral ke pone tur nanishi den mesun direkshon. Nos mester diskutí e asuntu aki konhuntamente pa weta kon por yega na un punto di salida komun pa atendé ku e problema aki”, segun e mandatario a indiká finalmente.