WILLEMSTAD - Alumnonan di Vespucci College por pasa eksamen normalmente e aña aki. Kiko lo pasa otro aña sinembargo no ta masha kla ainda. Korte a duna partidonan te ku ougùstùs di e aña aki pa yega na un areglo na drechi. Esei básikamente ta e sentensia ku korte a dikta awe mainta den e kaso ku mayornan di Vespucci College a entamá kontra sekretario di Estado Marja van Bijsterveldt.
Abogado di Vespucci College na Kòrsou mr. Leo van Spigt, na nòmber di mayornan di muchanan ku ta bayendo Vespucci College a tuma e desishon ku nan ta hiba gobièrnu ulandes, spesífikamente sekretario di Estado Van Bijsterveldt (di Enseñansa) korte. Meta di e kaso aki ta, pa garantisá ku nan yunan ta sigui pasa eksamen final normal na Kòrsou i ku nan no mester bai te Ulanda pa hasi esaki.
Mayornan, sostené pa nan abogado ta konsiderá e desishon di sekretario di Estado enkargá ku enseñansa Marja van Bijsterveldt komo un desishon inhustu i ku no ta kuadra tampoko ku regla.
Vespucci College ta un skol orientá riba muchanan ulandes i ta duna enseñansa avansá. E tin mas o ménos 200 mucha.
E alumnonan aki ta por parte muchanan di mayornan ku ta temporalmente stashoná na Kòrsou manera por ehèmpel di hendenan di marina ulandes, por parte muchanan di hendenan lokal.
T’asina ku for di aña 2001 e muchanan aki ta pasa eksamen ulandes na nivel di VMBO, HAVO i VWO atraves di un konstrukshon spesial ku a traha.
E konstrukshon aki ta den koperashon ku Ministerio di Enseñansa ulandes. E muchanan, unabes nan kaba tin tambe un diploma ulandes. E konstrukshon ta den koperashon tambe ku Montessori College na Nijmegen, Ulanda,
Despues di 6 aña, Van Bijsterveldt a para e kombenio aki na yüli 2007.
Van Bijsterveldt ta argumentá, ku eksamen ulandes por ser trahá solamente riba teritorio ulandes na Oropa.
Manera e abogado di Vespucci College mr. Van Spigt a argumentá den korte ántayera, e mandatario ulandes mester drei bèk e dekreto ku el a emití pa anunsiá e desishon, pasobra no tin niun motibu pakiko eksamen no por tuma lugá na Antia mes.
Korte awe mainta a dikta ku en todo kaso pa e aña aki, alumnonan por pasa eksamen sin problema. Pero, el a pone te fin di ougùstùs pa partidonan yega na un areglo definitivo. Mr. Van Spigt a bisa, ku ainda e no a weta e motivashon di korte di kon el a yega na tal desishon. En todo kaso e ta nifiká, ku pa e aña aki tin klaridat, pero pa e añanan ku ta bin kos ta konfuso ainda, el a agregá.