WILLEMSTAD - Riba término kòrtiku, mester reuní ku Venezuela riba e aktual kontratonan ku e tin Kòrsou, enkuanto di e preis di produktonan petrolero ku Kòrsou ta. Mester bin un klaridat riba e posibilidat pa baha e preisnan. Ademas Gobièrnu Sentral mester duna mas kontribushon den e sakrifisio ku ta wòrdu hasí, pa loke ta trata e medidanan den kuadro di oumento i preis di kombustibel.
Esaki ta loke ku entre otro a wòrdu diskutí den e reunion di Plataforma Sindikal e siman, despues ku gobièrnu a anunsiá e medidanan tumá den kuadro di e Komishon Energétiko.
Alcides Cova, presidente di Plataforma Sindikal a splika, ku aktualmente ta parse manera ku ta Kòrsou ta karga e peso di mas grandi. Mester aserká Gobièrnu Sentral tan pronto posibel pa laga Gobièrnu Sentral tambe, duna su kontribushon. E koperashon aki lo mester ta entre otro den forma di oumento di accijns i omzetbelasting. Sindikalismo ta di opinion, ku aparte di tur loke a wòrdu papiá kaba, mester traha riba e puntonan aki, segun Alcides Cova.
Refiriendo mas aleu na desaroyo di e último reunion di Plataforma Sindikal, Cova a indiká ku e reunion a bai hopi bon, den e sentido ku a duna e miembronan tur informashon ku tabata disponibel.
‘Ta masha hopi punto a bin dilanti ku nos ta kere ku sindikalismo mester tene kuenta kuné, aparte di tur e alternativanan ku sindikalismo a trese dilanti.
E presidente di Plataforma Sindikal a splika, ku tabatin dos kos, un komishon pa bin ku alternativa pa e oumento di preis di kombustibel i tambe un komishon di Bestuurscollege ku lo mester a karga su responsabilidat i tuma desishon ta kiko mester hasi. Bou di e komishon energétiko, a kai e ehersisionan pa formulá e medidanan di suavisashon.
E parti di oumento di preis di gasolin, e komishon no tabatin nada di haber kuné. ‘Niun momentu so, e representante di Plataforma Sindikal no a bai di akuerdo ku niun oumento’. Segun Cova, loke ku sí a purba, tabata pa tene kuenta ku e parti sosial pa esnan di ménos pudiente. I tambe pa mira ta kon ta bai sigui.
Por lo tantu, loke ku Plataforma Sindikal ta enfatisá, ta ku no ta Sidney Justiana komo persona òf ta Sitek tabata forma parti di e komishon energétiko . ‘El a bai na nòmber di Plataforma Sindikal i nos a sostené e loke ku el a hasi den e komishon’. Cova a splika, ku e idea ta pa djárason awor profundisá mas tantu riba e asuntu aki, pasobra ku e komishon a sigui traha i ku e siman aki tin un kantidat di reunion.
Hecho ta segun Cova, ku e oumento di preis di kombustibel a afektá nos komunidat hopi duru i ku mester mira kiko mester bai hasi aparte di konsientisashon.
Tur sindikato a haña informashon i pa bai bèk den nan seno i mester bai determiná kiko ta bai sigui hasi, pasobra e preis di krudo ta sigui subi i mester wak kiko ta hasi, Alcides Cova a remarká.