BUENOS AIRES – Atlas di Mexico, danki na un gol di Jorge Torres den kabamentu, a empatá 2-2 djarason ku Boca Juniors di Argentina den e promé partido di kuart final di Kopa Libertadores.
Torres a empatá na di 88 minüt den un wega di diferente kambio. Atlas a kuminsá ta bai ariba ku gol di Omar Flores na di sinku i Boca a empatá na di 36 ku un gol kontra di Hugo Ayala, te ora ku un biaha mas e argentinonan a bai ariba ku un gol di Julio Cesar Cáceres na di 70.
E di dos wega lo ta aki un siman na Guadalajara.
Ku un liña di kuater defensa i un preshon konstante den mediokampo, Atlas tabata wanta e poko atakenan di Boca i inkluso a regla pa kousa miedu ariba ku Bruno Marioni i Ulises Mendivil.
I den e promé yegada di e wega, e Zoronan di Guadalajara a habri kuenta ku un kabesaso di Flores, despues di un kòrner krusá i probechando un otro tiru di kabes di e argentino Diego Colotto.
Nèt den un kuartu di ora, e kiper Jorge Bava a kita un bala malu ku moketa riba un pase sin peliger, e bala a bai pa Rodrigo Palacio i su tiru a ser apénas desviá.
For di e ora ei, a keda bisto ku Boca tabata dispuesto pa bende su kueru karu i el a bai den atake ku tur kos, buskando prinsipalmente Palermo, bon marká pa Flores.
Despues di mei ora ku Boca ta preshoná a bin e gol kontra di Ayala, kende a hinka den su mes gol den un akshon ku Palermo i despues di un pase di Rodrigo Palacio for di banda drechi.
Den di dos mitar Boca a hinka e di dos ora Palermo a pasa pa Caceres i ku un tiru di kabes el a anotá.
Poko despues Boca a pèrdè e di tres ora un tiru di Juan Roman Riquelme a dal den palu.
I den su kontesta Atlas no a pordoná i el a bai ku un punto di oro danki na e gol di Torres, den un kontra gòlpi di e mèksikanonan.
E wega a hunga dilanti 42.000 persona riba kancha di Velez Sarsfield, ya ku Boca su stadion La Bombonera ta suspendé for di e wega di oktavo final kontra Cruzeiro di Brazil, ora un klòmpi di eis a dal den kabes di un wes di liña.
Den e etapa ei Boca a eliminá Cruzeiro i Atlas a likidá Lanús di Argentina.