WILLEMSTAD - E oumento di kosto di bida ku nos pais ta eksperensiando, komo konsekuensia dje desaroyonan mundial, tin su efektonan tambe riba e negosiashonnan pa kontrato kolektivo pa trahadó di diferente empresa riba nos isla.
LA PRENSA a entrevistá Humphrey Mongen, sekretario general di e sindikato Horecaf, kende a konfirmá ku aktualmente e sindikato ta den deliberashon pa sera un kontrato kolektivo pa entre otro empleadonan di Hotel Trupial Inn. ‘Den e kuadro negosiashonnan ku ta tuma lugá, nos ta tene debidamente kuenta ku e subida di kosto di bida. I Horecaf ta bai purba tambe pa subi e salario di e trahadónan, tantu posibel.’ Asina e lider sindikal, a sigui splika.
Mas aleu Mongen a remarká: ’’Pero nos ta konsiente ku no por keda subi e salario, pasobra kada bes e preis di petroli ta oumentá. I no ta tur bia por keda subi e salario. ‘P’esei nos ta kere ku mester bin un ‘maneho’ muchu mas dirigí kon bo por hasi pa suavisá henter e sistema aki, unda ku preisnan di petroli ta subiendo’.
Pa loke ta trata e efekto ku esaki tin spesífikamente pa trahadónan di horeka, e oumento di kosto di bida, mester bisa ku den e sektor i horeka, por lo ménos 50 pa 70 porshento di e trahadónan ta gana rondó di e salario mínimo. Esaki ta pone ku e impakto riba nan, ta esun di mas pisá. P’esei mes Horecaf ta kere ku awor sí gobièrnu mester subi e salarionan mínimo ku por lo ménos 15 porshento i no sinku porshento. Di e manera aki ta bira posibel pa traha un tiki dam pa tur e oumentonan ku ta pendiente i tambe Horecaf ta opiná ku en bes di sigui bringa ku otro, tur hende na Kòrsou mester sinta trankil ku otro a yega na algu kaminda ku ta mira ku nos tin un tiki defensa.