WILLEMSTAD - E piskadónan i Marina Real, ayera tardi a yega na un palabrashon, relashoná ku e konflikto ku tin enkuanto ehersisionan di tiramentu riba laman. Na repetida okashon, e piskadónan di Banda Abou a duna di konosé, ku nan tin hopi problema ku e ehersisionan aki.
Pero e grupo ku a representá e piskadónan di Banda Abou ainda no ke divulgá resultado eksakto di e reunion. Den deklarashon ku Erwin Koense, bosero di e piskadónan a hasi, el a splika, ku ainda no a informá tur e piskadónan enkuanto desaroyo di e reunion. E proseso pa informá e piskadónan sinembargo a kuminsá for di ayera nochi i ta kontinuá awe den dia, te ora ku logra informá tur e piskadónan, segun Erwin Koense.
Di parti di Marina Real, bosero Joos Rozenburg a bisa, ku e reunion a bai den bon esfera unda ku e partidonan a papia habrí ku otro. ‘Defensa a hasi un proposishon na e piskadónan pa yega na un uso komun di e área di laman’. Asina Rozenburg a splika, indikando ku Erwin Koense a pidi Marina Real, pa wanta ku divulgashon públiko di e detayenan di e proposishon te despues ku e tabatin kontakto ku tur piskadó. Segun Rozenburg, ta trata di un proposishon realístiko di parti di Marina. ‘Den esaki a tene kuenta ku e nesesidatnan di komunidat’, segun e bosero di Defensa.
Enkuanto e desaroyo dje enkuentro mes, Koense a splika LA PRENSA, ku e reunion a bai den un situashon hopi ameno. Ámbos partido por a splika nan punto di bista. Marina Real a splika ta dikon nan mester hasi e ehersisionan di tiramentu i tambe pakiko nan méster tira. Di parti di e piskadónan a bin dilanti e opheshonnan fuerte i tambe e pregunta ta dikon Marina Real, mester sigui tira.
E piskadónan di nan parti a indiká, ku nan ta konsiente ku e ta trata aki di un asuntu militarmente mirá hopi delikado.
‘Ounke ku no ta wòrdu bisá, tòg e piskadónan ta komprondé ta pakiko e ehersisionan mester tuma lugá asina frekuente’.
Tambe e piskadónan ta ansioso pa sa, ta dikon ta e piskadónan di Kòrsou mester wòrdu perhudiká i dikon Marina Real no ta tene su trainingnan riba un dje otro islanan antiano.