Pa bende Refineria Isla, mester habrí kontrakt promé!

WILLEMSTAD – “Promé ku hasi kualke intento pa bende Refineria Isla, mester habri e kontrakt ku tin awor aki ku e refineria. Asina simpel e kos ta. Anto si mester kibra e kontrakt, nos pais mester paga entre 500 pa 700 na daño perhuisio na PdVSA”.
Di e forma aki diputado enkargá ku Refineria Isla Humphrey Davelaar a kontestá vários miembro di Konseho Insular, ku durante e reunion públiko a hasi e pregunta den e direkshon aki.
Kiko lo bira futuro di e refineria, tabata e pregunta ku a kore manera un liña kòrá durante e reunion. Miembronan tabata ke sa kiko ta bai pasa, si ta renegoshá e kontrakt, si ta bai hasi intento pa bende òf kiko ta bai hasi.
Diputado Davelaar, kende alabes ta diputado pa enkargá ku Asuntunan Sosial a konsiderá nesesario ayera a para algun minüt ketu na selebrashon di Dia Internashonal di Famia, un dia ku mundu kompleto a rekòrdá ayera.
“Sin famia, no tin nada”, tabata e mensahe di e mandatario.
“Refineria Isla tin un relashon komersial direkto ku PdVSA. Laga nos pone esei bon kla dilanti. Gobièrnu di Kòrsou mes no tin niun relashon ku esnan ku ta hür e refineria. Atraves di Refineria di Kòrsou gobièrnu tin sierto influensia. Pero t’asina ku mester apuntá ku e akshonnan di Refineria Kòrsou ta den man di StIP, ku ta e doño hurídiko di Refineria Isla. Gobièrnu di Kòrsou den e kaso aki ta akshonista ekonómiko.
Atraves di StIP, ku ta kontrolá e hunta di komisario. E kompania mes tin un kontrakt firma ku PdVSA pa manehá e empresa,” diputado Davelaar a splika.
El a enfatisá ku tur kos ku Kòrsou ke hasi, ta kai i lanta ku loke tin pará den e kontrakt. Diputado Davelaar ta kere ku tin dos punto importante rondó di Refineria Isla ku awor aki ta hopi aktual, esta di un banda e oumento di preis di krudo konstante riba merkado mundial i e tema di polushon okashoná pa e refineria.
E asuntunan aki, partikularmente esun último a bira tema di diskushon.
“E ta tema di diskushon na Kòrsou, den Antia i asta den Reino. Mi tin sigur ku si nos kita e kos aki for di man, no tin motibu mas pa papia riba Refineria Isla. Mi tin sigur ku si preis di krudo baha, nos haña un solushon pa e problema di polushon, no tin nada mas pa papia ariba.
Awor aki mi a yega na e konklushon ku mi destino ta stipulá kaba. Lo mi mester keda den Konseho Insular por lo pronto, te ora tin solushon pa e problemanan aki,” e mandatario a bisa.
Davelaar por sierto a ripití su ponensia ku el a eksponé anteriormente kaba, esta ku polítika na Ulanda tambe ta metiendo ku e asuntu aki pa e mesun tema di polushon. El a bolbe enfatisá ku ta trata aki di un asuntu di nos pais i ku meskos ku Kòrsou no ta mete ku asuntunan interno di Ulanda, Ulanda mester siña respetá nos asuntunan.
Despues ku diputado Davelaar a kaba di kontestá e preguntanan den di dos buèlta di e reunion, gezaghèber Magaly Jacoba ayera tardi a posponé ta sigui otro siman dia 22 mei.