WILLEMSTAD – “Presupuesto supletorio pa 2008 a keda aprobá den Bestuurscollege. Djaluna awor, durante un reunion di Komishon Sentral di Konseho Insular 9’or di mainta, lo trata e presupuesto supletorio pa 2008”.
Esei diputado di Finansa a konfirmá ayera durante un enkuentro ku prensa.
E presupuesto nobo pa 2008, adaptá despues di último desaroyonan awor tabata mustra un défisit di 103 mion florin, ku entretantu gobièrnu a logra baha te 67 mion. Pa kubri e défisit aki, lo mester introdusí di un banda medidanan pa redusí gastu i oumentá entrada, miéntras ku di otro banda lo mester weta kiko por hasi riba merkado finansiero lokal. Hecho ta, ku kada ken mester duna nan aporte, asina diputado di Finansa Mike Willem a enfatisá.
Konseho Insular, fin di aña pasá a trata i aprobá kaba presupuesto pa e aña koriente. E presupuesto ei tabata basa di un banda riba e promesa di Ulanda ku e ta karga un parti supstansial di e défisit di e aña aki – ku Kòrsou mes a kalkulá na 103 mion florin – miéntras ku a keda un défisit mas di 66 mion florin, ku teritorio insular di Kòrsou mes, mester a weta kon e ta finansiá esaki.
Den e kuadro ei diputado Mike Willem a anunsiá ku den e promé kuartal di aña 2008 e lo presentá un plan pa indiká kon ta bai kubri e défisit di 66 mion aki (e asina yamá “dekkingsplan”).
E plan aki sinembargo a tuma mas tempu ku gobièrnu mes a pensa, loke tabata motibu tambe pa partidonan di oposishon hala atenshon di Bestuurscollege ku Konseho Insular ketu bai ta wardando riba e plan aki. Partikularmente e miembro di frakshon di Forsa Kòrsou, Gregory Damoen a lansa krítika riba gobièrnu pa e desaroyo aki.
Pero, manera entretantu ta konosí, e situashon a bolbe kambia, awor ku a resultá ku e proseso di saneamentu di debe di parti di Ulanda no por kuminsá ainda. E echo ku St. Maarten no ta di akuerdo ku vários di e puntonan den e lei ku mester regla supervishon finansiero pa Kòrsou i St. Maarten a pone ku e trayekto aki a stanka, di manera ku e no por kuminsá mas meimei di e aña aki manera tabata e intenshon. Ku konsekuensia, ku e défisit di 103 mion ku en prinsipio Ulanda mester a kubri, ta bèk grandi-grandi riba mesa. Manera LA PRENSA a informá ampliamente kaba, diputado Willem a indiká, ku lo mester bai hasi un apelashon riba merkado di kapital pa weta kon por kubri e défisit aki.
Esaki lo bira tambe e presupuesto ku Bestuurscollege lo mester trata djaluna awor.
Diputado Mike Willem a splika, ku gobièrnu a traha di tal forma riba e presupuesto, pa na momentu ku presentá esaki na Kolegio pa Supervishon Finansiero (Cft) e por pasa e eskrutinio di e kolegio aki sin problema.
“Ta mantené 103 mion florin komo défisit riba presupuesto. Tur kos ta mustra ku no tin saneamentu di debe e aña aki mas. Si nos konsiderá ku tur kos ta indiká ku e Kolegio pa Supervishon Finansiero lo bira operashonal práktikamente na fin di e aña aki, anto e proseso di saneamentu lo no tuma lugá na tempu mas.
Hefe di Finansa drs. Ivan Kuster a splika, ku gobièrnu di Kòrsou por spera mas entrada e aña aki. “T’asina”, segun el a splika, “ku Gobièrnu Sentral, pa diferente faktor ta risibiendo mas tantu entrada.
Tin un mihó “compliance” awor aki (hendenan ta kumpliendo mihó ku pagamentu di belasting), gobièrnu ta risibiendo mas tantu entrada a base di mas tantu pago di OB komo tambe mas tantu derechi di importashon. Manera ta konosí, un parti di e entradanan aki ta bin pa Kòrsou. Konsekuentemente, teritorio insular di Kòrsou tambe lo risibí mas entrada”, Kuster a agregá.