Dia di Bandera lo enfoká riba stimulashon patriotismo

WILLEMSTAD – “Dia di Bandera e aña aki, lo tin komo tema sentral “Patriotismo, amor den tur sentido di palabra”. Nos ta konsiderá, ku ta importante pa fomentá patriotismo”, asina diputado di Kultura Marilyn Alcalá-Wallé a partisipá.
Dia 2 di yüli benidero, lo ta Dia di Bandera. Manera kustumber, esaki lo ta kompañá ku e aktividat i seremonianan nesesario. E dia ta kuminsá ku un reunion solèm di Konseho Insular, despues di kua miembronan di Konseho Insular ta kana bai Plasa Brion kaminda e seremonia prinsipal ta tuma lugá.
Kontrali na otro añanan, e aña aki un grupo di hóben lo kana dilanti di miembronan di Konseho Insular ku e bandera grandi pa asina duna e akto di hisamentu di bandera mas realse.
“E aña aki nos lo enfoká riba dos aspekto: di un banda lo mustra riba e importansia di patriotismo, pero tambe lo enfoká riba identidat propio”, asina diputado Alcalá-Wallé a mustra.
El a bisa, ku mester bai traha muchu mas tantu riba “nation bulding”. “Esaki no mester bai solamente riba e aspekto di leinan di pais, pero mas tantu riba esfuersonan pa forha pais. Nos tur mester krese huntu den un solo direkshon”, e diputado a afirmá.
“E aña aki”, el a bisa, “lo tin vários inovashon den e programa. E aña aki lo tin mas atenshon pa e aspekto multi kultural. E aña aki lo dediká tambe mas atenshon na e aspekto di bario, na e aspekto di famia.
Nos deseo ta, pa kada kas hisa su bandera riba 2 di yüli. Tambe pa kada outo kore riba e dia ei ku e bandera chikitu den banda i lo tin diferente aktividat inovativo mas,” e diputado a bisa.
“Último añanan”, segun e diputado, “selebrashon di Dia di Bandera a haña un karakter práktikamente festivo so. E asuntu a para bira un asuntu di komementu i bebementu so. E parti di nifikashon di bandera kasi no ta hañando atenshon. Den esaki nos ke trese un kambio, e aña aki e nifikashon mester haña mas atenshon”, asina e diputado a remarká finalmente.